തണലിടം

ചേര് മരങ്ങള്‍.

2010-11-14T21:07:00.007+04:00

ഉറക്കം വരുന്നില്ല, ഉറക്കം വരാത്തതെന്ത്? രണ്ടു മൂന്നു ദിവസമായി. ഇന്നിപ്പോള്‍ ദേ ഒരു മണിയായി ഇനി വെറും നാലുമണിക്കൂറെ ഉറങ്ങാന്‍ കിട്ടൂ.ശരിക്കുറങ്ങിയില്ലെങ്കില്‍ എന്റെ മുഖം ഏതാണ്ട് വെരുകിന്റെ മുഖം പോലെ കൂര്‍ത്തും കറുത്തുമിരിക്കും. ദേഷ്യം വരുന്നു. ഉറക്കം വരാതിരിക്കുമ്പോള്‍ ദേഷ്യപ്പെട്ടിട്ട് എന്താണു പ്രയോജനം! ദേഷ്യത്തെ നട്ടുനനച്ചു വളര്‍ത്തി അതിപ്പോള്‍ഒരു ചേരുമരം പോലെ വളര്‍ന്ന് വല്ലാതെ പന്തലിച്ചിരിക്കുന്നു.അപൂര്‍വ്വം ചിലര്‍ക്കുമാത്രം അത് തണലും തലചായ്ക്കാനിടവും നല്‍കുന്നു മറ്റുള്ളവരൊക്കെ വന്നിരുന്ന് ചൊറിഞ്ഞ് മാന്തി നീരുവച്ച മുഖങ്ങളോടെ,ദേഹങ്ങളോടെ പ്രാകിക്കൊണ്ട് എഴുന്നേറ്റു പോകുന്നു.
ഞാനെന്തു ചെയ്യും? കാലാകാലങ്ങളില്‍ എനിക്ക് വെള്ളവും വളവും തന്നതിനു പകരം ഒരു വേനലിലിന് എന്നെയെങ്ങ് കരിച്ചുകളയരുതായിരുന്നോ?ഒരു വര്‍ഷത്തിന് അങ്ങ് പിഴുതുകളയരുതായിരുന്നോ? ചേരിനെക്കൊണ്ട് ആകെ ഒരുപകാരം മണ്ണാത്തി പാറുവിനായിരുന്നു.വെണ്ണീറിട്ടു പുഴുങ്ങി അലക്കിവെളുപ്പിച്ച മുണ്ടുകളുടെ കോണില്‍ കാഴ്ചയ്ക്ക് കരുപ്പിടിയെ വരച്ചെതെന്ന് തോന്നുന്നവിധം ഒരു അടയാളമിടാന്‍ ഇടയ്ക്ക് അവള്‍രണ്ടു കായ് പെറുക്കും. ഹും ചിലപ്പോള്‍ അവളുടെ തലമുറതന്നെയായിരിക്കും എന്നെയിവിടെ കുടിപാര്‍പ്പിച്ചത് എന്നിട്ടിപ്പോഴെന്തായി? അവള്‍ക്കു തലമുറയുണ്ടോ? അവരൊക്കെ പഠിച്ചു വലുതായി പണിക്കാരായി. ഇപ്പോ ഞാനവര്‍ക്ക് ഒരപമാനമായി.

"നിന്റച്ചമ്മ നട്ട ചേരാടാ നിഷാദേന്ന്"

ചെക്കനെ പിള്ളേര് ഓര്‍മ്മപ്പെടുത്തുന്നുണ്ടെന്നാണ് തോന്നുന്നത്.

കെഴക്കേകരേമ്മിലെ മൊയ്തുട്ടീന്റെ പീടികേലിക്ക് വല്ല അത്യാവശ്യ സാധനങ്ങളും വാങ്ങാന്‍ പോണ പോക്കില്‍ അലക്കി വെളുപ്പിച്ച് കൊടുക്കാനാവാത്ത ചിലരുടെ മനസ്സിലെ കറയെ പ്രാകിക്കൊണ്ട് ചെക്കന്‍ കല്ലെടുത്ത് അകലെ നിന്നൊരു ഏറ് എന്നെയെറിയും,അതു കൊണ്ട് വെളുത്ത ചോര പൊടിയും.

കര്‍ക്കട സംക്രാന്തിക്ക് പൊട്ട്യേകളയുന്ന പൊട്ടക്കലവും അടിക്കാടും കുപ്പയും മുഴുക്കെ എല്ലാവരും എന്റെ കടയ്ക്കല്‍ കൊണ്ടുവന്നിടും,
"പൊട്ടി പൊറത്ത് ശീവോത്യകത്ത്" ന്നും പറഞ്ഞ് ഒറ്റയേറാണ്,എന്നിട്ട് തിരിഞ്ഞു നോക്കാതെ നടന്ന് കിഴക്കേ കുളത്തില്‍ കുളിച്ച് വീട്ടിലേക്കു പോകും.പൊട്ടീം മക്കളുമെന്റെ കടയ്ക്കല്‍ കിടന്ന് പൊട്ടിമുളച്ച് പടര്‍ന്ന് പന്തലിച്ച് എന്നില്‍ ചേരും,ഏതോ ഒരു പൊട്ടിക്കലത്തിലേറി ഒരു കാട്ടുചേനത്തൈയ്യുംഅതിനിടയ്ക്ക് ചുവട്ടില്‍ മുളച്ചു വന്നു. കണ്ടാല്‍ നല്ല ഉരമുള്ള മൊഴുപ്പുമുറ്റിയ തണ്ടും വിഷമുള്ള
പച്ചച്ചോര നിറഞ്ഞു തുടിക്കുന്ന ഇലകളുമായി ഒരു സുന്ദരന്‍ കാട്ടു ചേന.മേടം പോക്കിന് അതിന്റെ കാളന്‍ വിരിയുമ്പോള്‍ ഒരു നാറ്റമുണ്ട് അപ്പോള്‍ പിന്നെ ഒരൊന്നന്നര ആഴ്ചത്തേയ്ക്ക് ഒരു മനുഷ്യ ജീവിയെ ഈ പ്രദേശത്തു കൂടി നോക്കേണ്ട.

"ചത്ത ശവം കെടന്ന് നാറണെന്ത്യാ ആ ചേരിന്റെ ചോട്ടില് നാറണെ എന്തിന്യാ തല്ലിക്കൊന്ന് കൊണ്ടോയിട്ടേര്‍ക്കണേന്ന് ആര്‍ക്ക
റിയാം?" എന്ന് ഉച്ഛത്തില്‍ ആത്മഗതങ്ങളുയരും.

പിന്നെ കുറേക്കഴിഞ്ഞാല്‍ അതിനൊരു തണ്ടും പച്ചക്കായ്കളും വരും,പഴുത്ത് നല്ല ചെമ്പഴുക്കാ നിറത്തിലങ്ങനെ സകലജീവികളേയും കൊതിപ്പിച്ചുകൊണ്ട് നില്‍ക്കും.മിക്കവാറും കുയിലുകളാണ് അതു തിന്നാനായി പറന്നെത്താറ്. കുശുമ്പു മൂത്തിട്ടാവണം ഏതെങ്കിലുമൊരു കാക്ക എവിടെനിന്നെന്നറിയാതെ പറന്നിറങ്ങി കുയിലിനെ ആക്രമിക്കും. "കൂ....വോ.......കു...ഹൂ.....കുഹൂ കുഹൂ...." എന്ന് ആവലാതിപ്പെട്ട് കുയില്‍ പറമ്പിലെ കുറ്റിച്ചെടികള്‍ക്കിടയിലൂടെ താഴ്ന്നു പറന്ന് രക്ഷപെടും .എന്തായാലും തൊണ്ടയില്‍ നിന്ന് വെറുതെയല്ല ഇത്ര നല്ല സംഗീതമുയരുന്നത്.മഴക്കാറ് കുനികുത്തിനിന്നു പെയ്യുന്ന ഒരു കര്‍ക്കടകത്തില്‍ കാട്ടുചേന ആരോ പറിച്ചോണ്ടു പോയി.

"പട്ടാളമാകും അല്ലാണ്ടാരാ ആ മന്തന്‍ ചേരിന്റെ ചോട്ടീപ്പോയി കാട്ടു ചേന പര്‍ക്ക്യാ?"
എന്ന് ആളുകള്‍ കുണ്ഡിതപ്പെട്ട് കര്‍ക്കടകം കഴിഞ്ഞു.ചേന കൊണ്ടു പോയത് നായാടിച്ചി കുറുമ്പയായിരുന്നു.
"ഏന്.....മ്പ്രാട്ട്യേയ്.... "എന്ന് പലപല പടിക്കലും കരഞ്ഞുവിളിച്ച് കുറുമ്പ തോളുമാറാപ്പില്‍ പലവിധം അരിയും ചിലതരം കിഴങ്ങും കയ്യില്‍ ഉറികെട്ടുന്ന ഇഞ്ചവള്ളിയുമായി തിരിച്ചു വരുന്ന വരവായിരുന്നു.പെട്ടന്ന് പടിഞ്ഞാറിനു മദം പൊട്ടി അലറിവിളിച്ച് കാടുമെതിച്ച് കര്‍ക്കിടകമഴ വന്നപ്പോള്‍ നായാടിച്ചിഎന്റെ ചോട്ടില്‍ വന്നിരുന്നു.ഉണങ്ങിയ കറുത്ത കൈത്തണ്ട,ചൊറിഞ്ഞ് മാന്തി മൊരിപൊന്തിയ വെണ്ണീറു നിറമുള്ള കാലുകള്‍, ഒട്ടിയുണങ്ങി ചുളിഞ്ഞ വയറ്.ചേരിന്റെചോട്ടില്‍ നായാടിച്ചി കുത്തിയിരുന്നു.

"പണ്ടാറമഴ മെന്ക്കെട്ത്തീലോ ന്റ തെയ്....വേ... ത് ഭൂ....."
എന്ന്‍പച്ച മുറുക്കാന്‍ ച്ണ്ടി തുപ്പി. അപ്പോഴാണ് തലയ്ക്കുമീതെ പന്തലിച്ചു നില്‍ക്കുന്ന കാട്ടു ചേന നായാടിച്ചി കണ്ടത് മാറാപ്പില്‍ നിന്ന് കത്തിയെടുത്ത് അടുത്തു നില്‍ക്കുന്ന കരിമ്പനത്തൈയ്യിന്റെ പട്ടത്തണ്ട് വെട്ടിയെടുത്ത് വന്ന അവള്‍ ചേനത്തണ്ടറുത്തു.

"കാട്ടുചേന ഇരുമ്പ് കൊള്ളാതെ പുയ്ങ്ങണം!! കൊരലുമുതല്‍ കുണ്ടിവരെ ചൊറിഞ്ഞ് ചാവും പണ്ടാറടങ്ങാന്‍" എന്ന് നായാടിച്ചി പിറുപിറുത്തു.

മുണ്ടകന്‍ നാടിന് കണ്ടം പൂട്ടുമ്പോള്‍ പെണ്ണുങ്ങള്‍ തോലുവെട്ടാനിറങ്ങും.വിരിപ്പുകൊയ്തത് കണ്ടത്തില്‍നിന്ന് കളത്തിലേക്കും മുണ്ട
കന്‍നാടിനുള്ള അടിവളമായ ചാണകം തിരിച്ച് വയലിലേക്കും ഏറ്റി നടു കുനിഞ്ഞ പെണ്ണുങ്ങള്‍ക്കിടയില്‍ മുഴുത്ത മാറ് ഉന്തിപ്പിടിച്ച് നിവര്‍ന്നു നടക്കുന്ന,ചേരിലും വലിഞ്ഞുകയറി തോലുവെട്ടുന്ന ചേലൊക്കെയൊത്ത ഒരു പെണ്ണ് പട്ടാളം മാത്രം!

"ഹഹ അവരു കേള്‍ക്കെണ്ട പട്ടാളം ന്നു വിളിക്കണത്."

"ഭ്ഫാ.... മൈരാണ്ടി പട്ടാളം ആരാന്ന് നിന്റെ തന്തോട് പോയി ചോയ്ക്കടാ തെണ്ടീ"എന്ന് അലറും.
ചില തല്ലുകൊള്ളി പിള്ളാരെ പറഞ്ഞുപറ്റിച്ച് കുടുബകലഹം വരെ ഉണ്ടാക്കിയ വിരുതന്മാരുണ്ട് നാട്ടില്‍.
"അപ്പാ അപ്പാ.... ഈ പട്ടാളം ന്ന് പറഞ്ഞാ ആരാ?"
"ഛീ... ആരാണ്ടാ എന്നോട് വന്ന് ഈ പോക്രിത്തരം ചോയ്ക്കാന്‍ നെന്നോട് പറഞ്ഞേ?"
"ഔസേപ്പാപ്ല പര്‍ഞ്ഞൂലോ അപ്പനറിയാന്ന്."
"ഓ.... നിന്റപ്പനൊര് പുണ്യാളന്‍! അങ്ങട് പറഞ്ഞ് കൊട്ക്ക്വേന്നോ ഓള് വെഞ്ചരിച്ച അന്നവെള്ളം മോന്തി വന്ന് ട്ടാദെവസൂം ന്റെ ന്റെ നെഞ്ഞത്ത് ങ്ങടെ അമ്പ്വെര്ന്നാള്ന്ന്."...... ''ത്ഭ്ഫൂ...........പട്ടാളം യാനകീനെ അന്വേഷിക്കുണു പൊന്നാര പുത്തറന്‍‍! ഹും....അതെങ്ങനാ വിത്തു കൊണം കാണിക്കാതിരിക്ക്വോ?"

എല്ലാപെണ്ണുങ്ങളും ഏറ്റുന്നതിന്റെ ഒരു പകുതികൂടി കൂടുതല്‍ ജാനു തലയിലേറ്റും,മരം കയറും, പിന്നെയുമുണ്ട് എന്നാണ് പെണ്ണുങ്ങള്‍ പരസ്പരംകുശുകുശുത്ത് ചിരിക്കുന്നത്, അതാണത്രേ പട്ടാളത്തിന്റെ കെട്ട്യോന്‍ കുഞ്ഞുട്ടി ഇങ്ങനെ ഉണങ്ങി വരണ്ട് നെല്ലിക്കോഴിയെപ്പോലിരിക്കുന്നത്.

"എടഞ്ഞാ ജാനു കന്നിന് നൊകം വച്ച് കണ്ടം പൂട്ടും, കളി ജാനൂന്റട്ത്ത് വേണ്ട കമ്മളേ"...ന്ന് ജാനു കമ്മളോട് പറഞ്ഞു എന്നൊക്കെ
ഒരു ശ്രുതിയുണ്ട്.

പട്ടാളം മരിച്ചു ഒരു ചിങ്ങമാസത്തില്, കേന്‍സറയാരുന്നൂന്ന്.

"പാവം എല്ലുമുറിയെ പണിതു ജീവിച്ചപെണ്ണായിരുന്നു" എന്ന് ആളുകള്‍ പരസ്പരം ദണ്ണം പറഞ്ഞു.

എനിക്കു വിഷമമായി വിണ്ടു പൊട്ടിയ വെണ്ണീറു നിറമുള്ള തൊലിയില്‍ നിന്ന് വിഷമുള്ള കറയൊലിച്ചു. ആരെയെങ്കിലും അതില്‍ മുക്കിയെടുത്ത് നിര്‍ത്തിച്ചൊറിയിക്കാന്‍,ഉടലില്‍ നീരു നിറച്ച് ശ്വാസം മുട്ടിക്കാന്‍ എനിക്ക് വല്ലാതെ തിടുക്കം തോന്നി.....

(തുടരും.......)

കിണറ്റില്‍ കൂടുവയ്ക്കുന്ന പൊന്മാനുകള്‍ക്ക്

2009-09-20T21:17:00.002+04:00

ഉത്തരവാദിത്വത്തിന്റെ ഭാരമേല്‍ക്കാതെ ധനികനാവാനാനുള്ള ത്വര മലയാളിയുടെ ചോരയില്‍ കലര്‍ന്നത് ഏതു തലമുറ മുതല്‍ക്കാണോ എന്തോ.ചെറിയ തുക മുടക്കി വലിയ സമ്പാദ്യം തിരികെ പ്രതീക്ഷിക്കുന്നവന്‍ അടുത്തതായി ചാടാന്‍ പോകുന്നത് കേരളത്തിലെ റിയലെസ്റ്റേറ്റുകാരുടെ കെണിയിലാണ് തീര്‍ച്ച.ഈ രംഗത്തേക്ക് കടന്നു വന്നിട്ടുള്ള പുത്തന്‍ തലമുറ കമ്പനികളെക്കുറിച്ച് ശരാശരി മലയാളിക്ക്,പ്രത്യേകിച്ച് പ്രവാസി മലയാളിക്ക് ഒന്നുമറിയാന്‍ വഴിയില്ല.കാശു പോയി തൂങ്ങിച്ചാവാന്‍ നേരത്ത് ഒരു സീരിയലയ്യപ്പനും,
സീരിയല്‍ ദേവിയും,വാസ്തുവും,അഷ്ടപഞ്ചമിയും കാണില്ല അവരെ രക്ഷിക്കാന്‍ തീര്‍ച്ച.

അതിസൂത്രം കണ്ട പൊന്മാന്‍ കിണറ്റിലേ കൂടു വയ്ക്കൂ എന്നൊരു പഴഞ്ചൊല്ലുണ്ട് ഇടക്കൊക്കെ ഓര്‍ക്കാന്‍

സിയാബ്.

ഇയാള്‍ ചെയ്തത് വഞ്ചനയാണെങ്കില്‍ പോലും അയാള്‍ ആ തുക ധൂര്‍ത്തിനല്ല ഉപയോഗിച്ചതെങ്കില്‍ ഞാന്‍ അയാള്‍ക്കൊപ്പമാണ്.നെറ്റിലെ പരിചയം മുതലെടുത്ത് തന്റെ പൈസ അടിച്ചെടുത്തു എന്ന് ആരോപിക്കുന്ന വ്യക്തിയോടാണെനിക്ക് പുച്ഛം.ആ പൈസ ദാനം ചെയ്യുമ്പോള്‍ അവരുടെ മാനസീകാവസ്ഥ എന്തായിരുന്നിരിക്കാം? കുറച്ചു ദിവസം കൊണ്ട് ആ മാനസീകാവസ്ഥ എങ്ങനെ മാറിപ്പോകുന്നു?ദാനത്തിനു മുന്‍പ് വിശദമായ ഒരന്വേഷണം നത്തുന്നതില്‍ നിന്ന് അവരെ പിന്തിരിപ്പിച്ച ഘടകം എന്തായിരുന്നു?.ചുളുവില്‍ പുണ്യം പ്രതീക്ഷിക്കുന്ന ആരും ഒന്നും ദാനം ചെയ്യാതിരിക്കട്ടെ.പുണ്യം/പ്രത്യുപകാരം പ്രതീക്ഷിച്ചു ചെയ്യപ്പെടുന്ന ദാനം ഒരു ഫലവും സൃഷ്ടിക്കുകയില്ല, അര്‍ഹതപ്പെട്ടവനല്ല അതു ലഭിക്കുന്നതെങ്കില്‍ അത് ദോഷം വരുത്തി വയ്ക്കുകയും ചെയ്യുന്നു. എന്തുതന്നെയായാലും സിയാബിന്റെ മുന്‍ കാലചരിത്രം മുഴുവന്‍ തട്ടിപ്പിന്റേതല്ല,എന്നുമാത്രമല്ല അത്യദ്വാനത്തിന്റെ വിയര്‍പ്പു രുചിയുണ്ട് ജീവിച്ച ഒരു ഭൂത കാലംഅയാള്‍ക്കുണ്ട്.
അങ്ങനെയൊരാള്‍ കുറ്റവാളിയായാല്‍ പോലും അയാളേക്കാളേറെ അയാളെ അങ്ങനെയാക്കിത്തീര്‍ത്ത സമൂഹത്തെ വിചാരണ ചെയ്യേണ്ടയിരിക്കുന്നു.

അഞ്ചലിന്റെ പോസ്റ്റില്‍ ചെയ്തൊരു കമന്റ്

http://anchalkaran.blogspot.com/2009/09/blog-post_20.html

പത്തുമുലയുള്ള പട്ടികള്‍ക്ക് എത്ര തലയുണ്ട്?

2009-01-10T14:40:00.001+04:00

പടച്ചതമ്പുരാന്‍ രണ്ടുകാലും രണ്ടു കയ്യും കൊടുത്ത് അനുഗ്രഹിച്ചു വിട്ടതാണത്രേ പട്ടി എന്ന വര്‍ഗ്ഗത്തിനെ നടുക്കടലില്‍ പോയാലും നക്കിയേ കുടിക്കൂ എന്ന സ്വഭാവം ഒരു അലങ്കാരമായി കൊണ്ടു നടന്നതിനാല്‍ നിവര്‍ന്നു നടക്കുന്നതിനേക്കാള്‍ രണ്ടു കയ്യും നിലത്തു കുത്തി നാലുകാലില്‍ നടക്കാം എന്നങ്ങു പട്ടിവര്‍ഗ്ഗ
പരിണാമശൃംഗലയിലെ പട്ടയടിച്ചു ഫിറ്റായൊരു യുവാവങ്ങു തീരുമാനിച്ചു.നക്കിയേ കുടിക്കൂ എന്നു മാത്രമല്ല മണപ്പിച്ചേ നടക്കാവൂ എന്നുമൊരു ഉള്‍വിളിയുള്ളതിനാല്‍ ഒരു തലകൊണ്ടു മാത്രം കാര്യങ്ങളെല്ലാം ഒരു വട്ടമെത്താന്‍ പാടായതിനാല്‍ ഇപ്പോള്‍ ഒന്നില്‍ കൂടുതല്‍ തലയ്ക്കു വേണ്ടി പരിണാമസെല്ലുപരിപാലന സൊസൈറ്റി മുഖാന്തരം പട്ടിത്തലൈവര്‍ ഒരു പരാതി ബോധിപ്പിച്ചതായാണ് അറിവ്. രണ്ടു മുലയുള്ള സകല ജീവികള്‍ക്കും ഒരു തലയാണെന്നിരിക്കെ ആറു മുതല്‍ എട്ടു വരെ മുലകളും അതിന്റെ ഇരട്ടിയെണ്ണത്തോളം കുഞ്ഞുങ്ങളെ ഒറ്റപ്രൊഡക് ഷനില്‍ ഉത്പാദന ശേഷിയുള്ളതുമായ പട്ടിവര്‍ഗ്ഗത്തിന് ന്യായമായും നാലു തലയ്ക്കെങ്കിലുമുള്ള അവകാശമുണ്ട് എന്നാണ് പരാതിയില്‍ ബോധിപ്പിച്ചിരിക്കുന്നതത്രേ.പക്ഷേ അഞ്ചെട്ടു മുലകളും നാലു തലയുമുള്ള പട്ടിത്തരുണികളെ ഭാവിയില്‍ പരിപാലിക്കാന്‍ പട്ടി പുംഗവന്‍മാര്‍ക്ക് തലയും കാലും വാലുമല്ല എണ്ണത്തില്‍ കൂട്ടേണ്ടത് എന്നാണ് നിവേദനത്തിലെ അദ്ധ്യയം7,ഖണ്ടിക7,വാചകം77ല്‍ പറഞ്ഞിരിക്കുന്നതത്രേ.വാചകത്തില്‍ ഊ..ഊ.... ഊന്നിയൂന്നിപ്പറഞ്ഞിരിക്കുന്നതായ ഒറ്റവാക്കില്‍ തട്ടിത്തടഞ്ഞ് ചര്‍ച്ച ലോകപ്രശസ്ത ചിത്രകാരന്‍ 'ഉര്‍ളിണ്‍ഷ്കോവ് മാപ്ലാരിഷ്ടോവിന്റെ' *സ്റ്റിക് ഹോള്‍ഡ് വെര്‍ട്ടിക്കല്‍ ലൂസ് മോഷന്‍*എന്ന ചിത്രത്തില്‍ കാണുന്നതു പോലെ അലസിപ്പിരിഞ്ഞ് ഒണങ്ങിപ്പിടിച്ചതായാണ് അറിവ്.

കേസില്‍ കക്ഷിചേരാന്‍ നാലു കാലില്‍ നടക്കുന്ന മറ്റു ജീവികളുടെ ഒരു സംഘടന സ്ഥലത്തെ പന്നിപ്രമുഖന്റെ നേതൃത്വത്തില്‍ യോഗം ചേര്‍ന്നതായും വാര്‍ത്തയുണ്ട്.ഇതിനിടെ മുലയേ ഇല്ലാത്ത പക്ഷിവര്‍ഗ്ഗത്തില്‍ പെട്ട ചിലരുടെ നേതൃത്വത്തില്‍ പക്ഷികള്‍ക്കും മുലകള്‍ വിതരണം ചെയ്ത് സമൂഹത്തിലെ മാന്യമായ മുലനിലവാരത്തിലേയ്ക്ക് അവരെയും കൈപിടിച്ചുയര്‍ത്തണമെന്ന് ഒരു നിവേദനത്തിനു സാധ്യതകാണുന്നതായി പരിണാമപരിപാലനസൊസൈറ്റി അധ്യക്ഷന്‍/ക്ഷ ഒരു വാര്‍ത്താക്കുറിപ്പില്‍ അറിയിച്ചു.

തലയുണ്ടായിട്ടും മുലനിറയെ പാലുണ്ടായിട്ടും പേരിനു രണ്ടു കാലുണ്ടായിട്ടും തന്റെ കുഞ്ഞിനെ കാലു നീട്ടിയിരുന്ന് ഇച്ചിരി അമ്മിഞ്ഞ കൊടുക്കാന്‍ പറ്റാത്തതിനാല്‍ തമ്പ്രാന്റെ മണ്ണില്‍ കാലൂന്നിനടക്കാന്‍ തക്കം ഈരണ്ടു കാലിനു വേണ്ടി അപേക്ഷവയ്ക്കാന്‍ വവ്വാല്‍ യവതികളുടെ തിക്കും തിരക്കും സൊസൈറ്റിക്കു മുന്നില്‍ കാണാം.

സാമ്പത്തീക മാന്ദ്യത്തിന്റെ ഫലമായി പിരിച്ചു വിടപ്പെട്ട ഡിസൈന്‍ വിഭാഗത്തിലെ ജോലിക്കാരുടെ കുറവു മൂലം തലയും മുലയും തന്നെ ഡിസൈന്‍ ചെയ്യാന്‍ പറ്റാതിരിക്കെയാണ് 'ഇടിവെട്ടേറ്റവനെ വെടിവെച്ചിട്ടു' എന്നു പറഞ്ഞ് പോലെ കയ്യിനും കാലിനും വാലിനും വരെ ഇത്രയധികം ആവശ്യകത വര്‍ദ്ധിച്ചിരിക്കുന്നത്.
അതൊന്നും പോരാതെ മറ്റൊരു ഗൂഡ സംഘം ഭൂമിയിലാകെ രണ്ടേരണ്ട് അവയവങ്ങള്‍ മാത്രം മതി എന്ന തീവ്രമായ നിലപാടാണ് സ്വീകരിച്ചിരിക്കുന്നതെന്നറിയുന്നു രണ്ടേ രണ്ടവയവങ്ങള്‍മാത്രം അവശേഷിക്കുന്നതുവരെ യുദ്ധം അല്ലെങ്കിലും യുദ്ധം എന്നതാണ് തങ്ങളുടെ അജണ്ട എന്ന് അവര്‍ അറിയിക്കുന്നു.

ഇത് മോങ്ങാനിരുന്ന പട്ടിയുടെ തലയില്‍ വേട്ടേക്കെരന്‍പാട്ടു നടത്തിയതു പോലായി.ഈ നിലയ്ക്കു പോയാല്‍ പരിണാമപരിപാലനസൊസൈറ്റി മാത്രമല്ല പ്രൊഡക്ഷന്‍ യൂണിറ്റുവരെ ഒറ്റയടിക്കു പൂട്ടി താക്കോല്‍ വല്ല കടലിലുമെറിഞ്ഞ് കാശിക്കോ രാമേശ്വരത്തോ സ്വയം നിര്‍മ്മാര്‍ജ്ജനത്തിനു പോകുമെന്നാണ് ആഗോളനിര്‍മ്മാണപരിപാലനനിര്‍മ്മാര്‍ജ്ജന സൊസൈറ്റിയുടെ ഔദ്ധ്യോധ്യോതിക വെബ് സൈറ്റില്‍പറയുന്നത്.

ഇതിനെല്ലാം മുലകാരണം ദേ ഇവിടെ കൊടുത്തിരിക്കുന്നു.

രണ്ടു ധീരരെ കണ്ടു.

2008-12-01T10:55:00.000+04:00

രാജ്യസ്നേഹമെന്നതു ബ്ലാക്ക് ക്യാറ്റുകളുടെ മിടുക്കില്‍ തൊപ്പിയും തലപ്പാവും വച്ചു മൈക്കിനുപിറകില്‍ നടത്തുന്ന വായാടിത്തമല്ലെന്നു സ്വജീവന്‍ കൊണ്ടു തെളിയിച്ച ധീര ജവാന്‍ 'ഹേമന്ത് കാര്‍ക്കറെ'യുടെ ധീരപത്നി. ധീരതയെ പണം കൊടുത്തു പാട്ടിലാക്കാമെന്ന കപടരാഷ്ട്രീയക്കാരന്റെ കുബുദ്ധിയെ പുറം കൈ കൊണ്ടു തട്ടിക്കളഞ്ഞ ധീരമാതാവ്. നിങ്ങള്‍ തന്നെ ഭാരത സ്ത്രീ,അഭിവാദ്യങ്ങള്‍.

31-ആം വയസ്സില്‍ യൗവ്വനം എന്തിനുവേണ്ടിയാണുപയോഗിക്കേണ്ടതെന്ന് ഭാരതയുവത്വത്തിനു സ്വജീവന്‍ കൊണ്ടു കാട്ടിക്കൊടുത്ത ധീരജവാന്‍ 'സന്ദീപി'ന്റെ പിതാവ് . ശവം തീനികളെ വീട്ടില്‍ കയറ്റാതെ ആട്ടിയോടിക്കാന്‍ താങ്കള്‍ കാണിച്ച ആര്‍ജ്ജവം കണ്ണു തുറന്നു കാണട്ടെ ജനം. പോക്കറ്റു രാഷ്ട്രീയത്തിന്റെ പോക്കണം കെട്ട സന്തതികളെ കൈകാര്യം ചെയ്യാന്‍ ജനം പഠിക്കേണ്ടത് താങ്കളെപ്പോലുള്ളവരില്‍ നിന്നുതന്നെ, അഭിവാദ്യങ്ങള്‍.

യാത്ര

2008-11-05T12:53:00.006+04:00

എല്ലാം അത്ര വിദഗ്ദമായി ആലോചിച്ചുറപ്പിച്ച് പടികളിറങ്ങുമ്പോള്‍ ഉള്ളില്‍ കൊളുത്തിട്ടു വലിക്കുന്ന സ്മൃതികള്‍ അനവധിയായിരുന്നു.പിന്നീട് ഒഴിഞ്ഞ കീശയും മുഷിഞ്ഞ മനസുമായി തിരിച്ചണയുമ്പോള്‍ മടുപ്പില്ലാതെ അവള്‍ കാത്തുനിന്നിരുന്നു.കുളിച്ചുതോര്‍ന്ന ഉടല്‍കാന്തിയോടെ അതേ മൗനസംഗീതവും നറുമണവുമായി,വെള്ളിലപ്പൂങ്കസവു പുടവചുറ്റി ഇടയ്ക്കിടെയിളംകാറ്റിലുലയുന്ന വാര്‍മുടിയില്‍നിന്ന് വാടാത്ത പൂക്കളുതിര്‍ത്ത്,മഞ്ചാടിമണികളിടയ്ക്കിടെ പാകിയ തണല്‍ പരവതാനിവിരിച്ച് പ്രസരിപ്പുള്ള ഒരു ചെറു മന്ദഹാസവുമായി.

കാലത്തിന്റെ കാളരാത്രികള്‍ക്കൊരു പുലരിയില്ലെന്നു കരുതിയിരുന്ന ഇരുണ്ട നാഴികകളിലെപ്പൊഴോ
അവളുടെ ആലിംഗനത്തിന്റെ ഊഷ്മാവുയര്‍ന്ന് ഉടലാകെ പുഴുകാന്‍ തുടങ്ങി.അടര്‍ത്തി മാറ്റിയിട്ടും ഉയിരിലുമുടലിലുമവള്‍ പടര്‍ന്നു മൂടുമ്പോള്‍,ഉണരാനോര്‍ത്തൊരു പ്രജ്ഞയെ മെല്ലെ പാടി മയക്കുന്നെന്നു തോന്നിയപ്പോള്‍ എപ്പൊഴോ പയ്യെ അവളെ വെറുക്കാന്‍ തുടങ്ങിയിരുന്നു.ജീവിതം ചവച്ച് നീട്ടിത്തുപ്പിയ ചോരപോലെ വഴിനീളെ പൂമരത്തിന്റെ പൂക്കള്‍ വാടിക്കിടന്നു.ഉള്ളു പറിച്ചെടുത്തൊരു ക്ഷയരോഗി തുപ്പിയ കഫക്കട്ടപോലെ അളിയാന്‍ തുടങ്ങുന്ന ചപ്പുകളില്‍ വീണുകിടന്ന കോളാമ്പിപ്പൂക്കള്‍ വെറുപ്പിരട്ടിപ്പിച്ചു. വാടിയ പൂക്കളെ,പുഴുത്തുവീണ നിറംകെട്ട ഫലങ്ങളെ,തായ് വേരില്‍നിന്നുണക്കം ബാധിച്ച് വിളറിയ മഞ്ഞളിപ്പുമായി നില്‍ക്കുന്ന പറങ്കിമാവുകളെ മാത്രം വഴിനീളെ കണ്ടു,വെറുപ്പ് സര്‍വ്വത്ര വെറുപ്പ്.ഇരയെ ഇറുകെപ്പുണര്‍ന്നൊരു രക്തയക്ഷിയെപ്പോലെ അവളെ കണ്ടു ജീവനിലേക്കാഴ്ത്തിയ കോമ്പല്ലുകളില്‍ ചോരക്കറ കണ്ടു.മനസ്സിന്റെ ഉറവകളില്‍ നിന്നൂറ്റിയെടുക്കപ്പെടുന്ന മനുഷ്യത്വം,ഇനി സന്നിവേശമാണ്.ദുരിത പര്‍വ്വങ്ങളുടെ രണഭൂമിയില്‍ തലയറ്റുപിടയുന്ന കബദ്ധങ്ങളാണോ നിലയറ്റ ആര്‍ത്തനാദങ്ങളാണോ ഒരു ഞെട്ടലോടെ ഉണര്‍ത്തിയതെന്ന് അറിയില്ല.ആത്മാവിന്റെ അവസാനകണവും അവളൂറ്റിയെടുക്കും മുന്‍പ് ആഞ്ഞു കുതറുകയായിരുന്നു.പറിഞ്ഞു ചിതറിപ്പോയ ഹൃദയത്തിന്റെ വേദന വെറുപ്പിന്റെ അല്ലെങ്കില്‍ പ്രതികാരത്തിന്റെ ഉറഞ്ഞുകയറുന്ന തരിപ്പില്‍ അറിയുന്നില്ലായിരുന്നു ഹൃദയത്തിന്റെ സ്ഥാനത്തൊരു കല്ലുപ്രതിഷ്ഠ വയ്ക്കാന്‍ തീരുമാനിച്ചത് അപ്പോഴായിരുന്നു.കണ്ണീരോ,തണ്ണീരോ,ഹൃദയമൂറ്റിയെടുത്ത രക്താര്‍ച്ചനതന്നെയോ ചെയ്താലും ഒരു തുള്ളിയേശാതെ,തൊടാന്‍ തോന്നിപ്പിക്കുന്നതും തൊട്ടാല്‍ കൈമുറിയുന്ന വശങ്ങളുമുള്ള ഒരു വെറും വെള്ളാരങ്കല്ല്.

കാലത്തിന്റെ പാഴിരുട്ടില്‍ പെട്ടുകിടന്ന കാതങ്ങള്‍ താണ്ടാന്‍ പാദങ്ങള്‍ക്കുപോലും ചിറകുകള്‍ വേണം,ലക്ഷ്യം മാത്രമാണ് ഏക ശ്രദ്ധ.ഉള്ളിലടിഞ്ഞ അവഗണനയുടെ,വെറുപ്പിന്റെ സെല്ലുകളാണ് ഊര്‍ജ്ജദായകം,അവജ്ഞയുടെ പരിഹാസത്തിന്റെ കൂക്കു വിളികളാണ് പ്രോത്സാഹനം.പലായനത്തിനു പരാജയമെന്നു പേരിട്ട് വിരല്‍ ചൂണ്ടി പൊട്ടിച്ചിരിക്കുന്നവര്‍ക്കിടയിലൂടെ ഒരു സാദാരണക്കാരനായി കൈലിയും മടക്കിക്കുത്തി കൈയ്യുംവീശി നടക്കണം. അവജ്ഞയുടെ മഞ്ഞളിച്ച നാളങ്ങള്‍ താനെയണയുന്നതുമാത്രം ഒന്നാസ്വദിക്കണം.പിന്നെ,പിന്നെയും ബാക്കിയാവുന്ന ഒന്ന് അവളെ ഒന്നുകൂടി കാണണമെന്നാണ് അന്നത്തെപ്പോലെ സുസ്മേരവദനയായി.വെള്ളിലപ്പൂഞ്ചേലചുറ്റി വെറ്റമുറുക്കിത്തുടുത്ത ചുണ്ടില്‍ ഒരു മൂളിപ്പാട്ടുമായി,കാറ്റിലുലയുന്ന കാര്‍കൂന്തലില്‍ നിന്നുതിരുന്ന നറുമണം നുകര്‍ന്ന് ചൂണ്ടുവിരല്‍ ചുണ്ടില്‍ ചേര്‍ത്തവള്‍ നീട്ടിത്തുപ്പിയ മുരിക്കിന്‍ പൂക്കള്‍ പൊഴിഞ്ഞു കിടക്കുന്ന ഇടവഴികളിലൂടെ ഒന്നു കൂടി നടക്കണമെന്നുമാത്രമാണ്.

ഭൂമി ഉര്ണ്ട്ട്ടല്ല

2008-10-10T13:00:00.002+04:00

ഭൂമി ഉര്ണ്ട്ട്ടല്ല

പത്താംക്ലാസ്സില് പഠിക്കണ പിള്ളേരുള്ള കുടുമ്മത്ത് ചുമ്മാ കലഹമുണ്ടാക്കണ്ട കുട്ടേട്ടോ അവരെങ്ങാനും ഇതു കേട്ടാല്‍ തന്നെ വല്ല കാട്ടിലും കൊണ്ടു പോയി കളയും

പിന്നേ അവര് എന്തു പഠിക്കുണൂന്നല്ല ഞാന്‍ എന്ത് കാണണൂന്നുള്ളതാണ് എന്റെ ശരി.നീയ്യ് ഇവടെനിന്ന് ട്ട്
എല്ലാവടത്തേക്കും ഒന്നു നോക്ക്യേ..

നോക്കി, എന്തേ??

പരന്നിട്ടാണോ ഉര്ണ്ട്ട്ടാണോ കാണണേ?

അല്ല അതിപ്പൊ എങ്ങന്യാ പറയുക ഇത്തിരി ഉയരത്ത് നിന്നു നോക്ക്യാലെ അറിയാമ്പറ്റൂ.

നീ കുറ്ക്കന്‍ കുന്നിന്റെ മോളി ക്കേറീണ്ടൊ?

ഉവ്വ്

ന്നിട്ട് അവിടന്നു നോക്കീപ്പൊ എങ്ങന്യാ കണ്ടത്?

അങ്ങനെയല്ല കുട്ടേട്ടാ അതിങ്ങനെ വിമാനത്തിലൊക്കെ പോകുമ്പഴേ കാണാമ്പറ്റൂ, ടീവീലൊക്കെ കണ്ടിട്ടില്ലെ?

ടീവീല് എന്താ കണിക്കാന്‍ പറ്റാത്തെ ദിനോസറിനെ വരെ കാണിക്കിണില്യെ? അതൊക്കെപ്പൊ ഇണ്ടായിട്ടാ?

ചുമ്മാ താന്‍ ആളെ വടിയാക്കാന്‍ വേണ്ടി ഓരോന്നു പറഞ്ഞു നടന്നോ വേറാരും കേള്‍ക്കണ്ട വിഡ്ഢിത്തം.

പിന്നേ ഞാന്‍ നിക്ക് അറീണതേ പറയൂ ഞാന്‍ കണ്ടിട്ടില്ല ഭൂമീനെ ഉര്ണ്ട്ട്ട് അപ്പൊ നിക്ക് ഭൂമി പരന്നതാ.
യ്യൊന്ന് ആലോയ്ച്ചോക്യേ ഭൂമി ഉര്ണ്ട്ടാച്ചാല്‍ ന്റെ കണ്ടത്തിലെങ്ങന്യാ വെള്ളം നിക്കണെ?

ന്റമ്മോ താന്‍ എന്നെയങ്ങു കൊല്ല്, ടോ മനുഷ്യാ ഭൂമി എത്ര വല്യതാന്നാ തന്റെ വിചാരം?
ഭയങ്കര ബുദ്ധിമാനാന്നാ വിചാരം പൊട്ടത്തരം മാത്രെള്ളു കയ്യില്.

ന്നാ നീയ് ഒരു വല്യ പ്ന്തെടുത്തിട്ട് അയിന്റെ മീതെ ഇത്തിരി വെള്ളം നിര്‍ത്തിക്കാണിച്ച് തായൊ എന്തെ..

എനിക്കു വയ്യെന്റെ ദൈവമേ, ടോ മനുഷ്യാ അതിന് ആകര്‍ഷണ ശക്തി വേണം

പിന്നേ ആകര്‍ഷണം,തുടങ്ങി ഓരോരോ അനുതാരികള് അതെയ് അതാ ഞാന്‍ പറഞ്ഞത് ഭൂമി പരന്നിട്ടന്നെ.
നീ വേണച്ചാ ലോകത്ത് എവടെ വേണച്ചാല്‍ പോയി നോക്കിക്കോ ഭൂമി പരന്നിട്ടന്ന്യാണ്.

ശരി കുരോ വേറെന്തൊക്കെയാണാവോ അങ്ങയുടെ സങ്കല്പ്പങ്ങള്‍, ദിവ്യ പ്രബോധനങ്ങള്‍!!! അടിയന്‍...

ഹഹഹ അങ്ങനെ വഴിക്ക് വാ. എന്താപ്പൊ ഭൂമിക്ക് പരന്നിട്ടായാല്.

ഒരു കോഴപ്പോല്യ അങ്ങ് അടുത്ത കണ്ടു പിടുത്തം പറയു.

നീ ഞാറ്റ്യെട്ടീലിക്ക് പോര്ണ്വോ കയ്പ്പയ്ക്ക് പന്തലിടണം വയ്യിട്ട് ചിറ്റ് വെളക്കാ.

അയ്യൊ ഇന്ന് ഒന്നാന്ത്യാണോ?

പിന്നെ കുംഭം ഒന്നാ ചിറ്റാഴിക്കാരടെ വക്യാന്നാ കേട്ടത്.

വല്ല ഗുണോണ്ടാവുമോ അതോ കൊറെ ഒണക്കലുകളാണോ എന്തോ

അല്ലടാ അവരടെ ബോംബേക്കാര് പെമ്പിള്ളാരു വന്നിട്ട്ണ്ടത്രേ ഇന്ന് ചിറ്റ് വെളക്കിന് ഭക്തന്മാരടെ തിക്കും തെരക്ക്വാവും.

എന്താ പായസം?

എന്ത് പായസം കുത്തര്യന്നെ,ആ തിര്മേനി ഒന്ന് കഴ്കീട്ട് വെച്ചാ മത്യേര്‍ന്നു. കഴിഞ്ഞ തവണ കല്ലു കടിച്ചേന്റെ വേദന ഇതു വരെ മാറീല്യ.

ആല്ല, അമ്പലത്തീ കേറാള്ള വല്ല ഉദ്ധേശവുമുണ്ടോ?

ഏയ് ആ വക പരിപാടി നമ്മ് ക്കില്യ.

അപ്പോ പൂയത്തിന് വല്യ കാര്‍ന്നോപ്പാടായിട്ട് ചാടിക്കേറ്ണ് കാണാല്ലോ

അതിന് കുപ്പായഴിക്കണ്ടലോ.

അപ്പൊ ഷേര്‍ട്ടഴിക്കാത്യാച്ചാല്‍ കേറാംന്ന് അല്ലേ

കുപ്പായട്ടോണ്ട് മ്മളെക്കാണാന്‍ദൈവത്തിനു പറ്റ്ണില്യാച്ചാല്‍ ഞാന്‍ പൊറത്ത് നിന്നോളാന്നെ, അല്ലെങ്കി പിന്നെ പെണ്ണ് ങ്ങളും കുപ്പായടര്ത്.

ഹഹഹ കള്ളക്കാര്‍ന്നോരേ ഇതാണല്ലേ മനസ്സിലിരിപ്പ് വെറുതെയല്ല നല്ലപ്രായത്തില് കാരച്ചു പോയത്.

നിക്കെന്തറാ ഒര് കൊറവ് 45 വയസ്സ് ള്ളപെണ്ണിനാ അതോ നിക്കാ ആരോഗ്യം അതു പറ ഞാന്‍ വിചാരിച്ചാലേ കിളി കിളി പോലത്തെ പെമ്പിള്ളാരെ കിട്ടും ഇപ്പഴും ആഹ!

കുനുഷ്ടു ബുദ്ധീ വെറുതെയല്ല തന്റെ ഭൂമി പരന്നോണ്‍ടായത് ഒക്കെ തന്റെ സൗകര്യത്തിനനുസരിച്ചാവണം ല്ലേ
അല്ല എന്തായീ സൗന്ദര്യത്തിന്റെ ഒരു രഹസ്യം.

പണീട്ക്കണടാ പണീട്ക്കണം പണീട്ത്ത് ട്ട് എറച്ചീന്ന് ള്ള കൊഴ്പ്പ് എറങ്ങിപ്പോണം ന്നാലേ ഈ ഗ്ലാമറൊക്കെ കിട്ടൂ.

അല്ല, ഒച്ചീം എനക്കോന്നുല്യല്ലോ പ്രാണപ്രേയസി എവടെപ്പോയി?

എന്ത്!?

അല്ല സരസുത്യേച്ചി എവടെപ്പോയീന്ന്

ഓ അവള് പോയിണ്ടാവും നേരം വെളിച്ചാമ്പോ വല്ലോടത്തേം വെവരം തെരക്കാന്‍ ഒര് കോഴി മുട്ങ്ങീട്ത്ത് പൊരിക്കാന്‍ പറഞ്ഞിട്ട് ഇവളിതെവടെപ്പോയിരിക്ക്വാ ട്യേ......യ്.

മുട്ങ്ങ്യല്ല, മുട്ട കോഴിമുട്ട.

ആ അതന്നെ.

ഔ,ഔ എന്തൊരു ധൈര്യം ആളടുത്തൊന്നൂല്യാന്ന് ഒറപ്പാണ് ലേ അതാ ഒച്ചയിത്ര പൊന്തുന്നെ.

ഹും പിന്നേ അവളേനെണ്ടലോ ഞാന് ങ്ഹാ..

ഓ പിന്നെ പിന്നേ, ആങ്ങളമാര് മൂന്നാട്ടൊ ഇടിച്ചു ചപ്പാത്തിയാക്കും തന്നെ,വെറുതെ വെളച്ചിലെടുക്കണ്ട
കാലത്തെന്തായിരുന്നു കാപ്പിക്ക്?

ഓ, ദോശീണ്‍ടാക്കി വെച്ചേര്‍ക്കണു തേങ്ങ്യരച്ച് ചട്ണീം ആര്ക്ക് വേണം?

സംഭവം കഴിഞ്ഞോ?

അവടീണ്ട്, വായോ കഴിച്ച് ട്ട് ഞാറ്റ്വെട്ടീപ്പോകാം.

ഇതാണു കുട്ടേട്ടനുമൊത്തുള്ള ഒരു ഞായറാഴ്ചയുടെ ആരംഭം.നാല്പത്തഞ്ചു വയസ്സു പ്രായം ഇരുപത്തഞ്ചു വയസ്സിന്റെ ശരീരം. കുറേ കിടിലന്‍ ആശയങ്ങള്‍ പരന്ന ഭൂമി അതില്‍ തീരെച്ചെറിയ ഒന്ന്.നാട്ടിന്‍ പുറത്തെ നന്മ നിറഞ്ഞൊരു കഥാപാത്രം.അയിത്താചാരം നിലനിന്ന തറവാടിന്റെ വാതിലുകള്‍ ഇങ്ങേര്‍ മുതിര്‍ന്നതിനു ശേഷം ആര്‍ക്കുമുന്നിലും അടയുന്നില്ല നന്മനിറഞ്ഞ കുടുംബം.എപ്പോള്‍ ചെന്നാലും എന്തെങ്കിലും കൊറിക്കാന്‍
അല്ലെങ്കില്‍ ഒരു കട്ടനെങ്കിലും.കൊട്ടിയടച്ച വാതിലിനു പിന്നില്‍നിന്ന് ബീപ് ഹോളിലൂടെ നോക്കി തീര്‍ച്ചപ്പെടുത്തി
അല്പം തുറക്കപ്പെടുന്ന വാതിലുകളല്ല,സദാസമയവും സൗഹൃദത്തിന്റെ കൊച്ചു പിണക്കങ്ങളുടെ ഇണക്കങ്ങളുടെ ചിരിയും ഒച്ചയും കലമ്പലുകളും ചുറ്റും പരത്തുന്ന ജീവനുള്ളൊരു വീട്.ഞായറാഴ്ച്ചകളിലെ പ്രഭാതം മിക്കവാറും തുടങ്ങാറുള്ളത് അവിടെനിന്നായിരുന്നു. നാട്ടില്‍ നിന്നു പോന്നിട്ട് അങ്ങേരുടെ മിസ്കോളില്ലാത്ത ഒരു ദിവസമെങ്കിലും കടന്നു പോയിട്ടില്ല.

പിന്‍ വിളികള്‍

2008-08-26T11:03:00.000+04:00

കണ്‍ടില്ലെന്നു ഭാവിച്ചു നടന്നു പോവുമ്പോള്‍ ഒരു വിളി
ശ് ശ്...., തിരിഞ്ഞു നോക്കണമെന്നില്ല.അവിടെ കാത്തിരിക്കുന്ന കാഴ്ച എന്തെന്ന് മനസ്സിലുണ്ട്,ദാരിദ്ര്യത്താല്‍
നിസ്സഹായതയാല്‍,രോഗങ്ങളാല്‍ ദൈന്യത മുറ്റിയ മുഖങ്ങള്‍.ഓ ഇതൊക്കെയല്ലേ എല്ലാം ലോകത്തില്‍ പതിവുള്ളത് എത്രകണ്ടിരിക്കുന്നു എത്രപേരെ സഹായിക്കാന്‍ കഴിയും? ഇതൊക്കെ സാധാരണം. പക്ഷേ പിന്നെയങ്ങ് മനസിനൊരു കിരുകിരുപ്പ് ഒരു ചായ കുടിക്കാം എന്നു കരുതി കിച്ചണിലേയ്ക്കു ചെന്ന് ഗ്ലാസെടുത്ത് നെസ്ലെയുടെ ടീമേക്കറില്‍ വച്ചു.ആറേഴു ബട്ടണുകളില്‍ ഏതമര്‍ത്തണം? കപ്പൂചിനൊ,നെസ്ലെ കൊഫീ,ചോക്കലേറ്റ്,........ അടുക്കളക്കരിയും മഴവെള്ളവും ചേര്‍ന്ന മണം പെട്ടന്നു മൂക്കില്‍ അടിച്ചപോലെ.ഗ്ലാസെടുത്ത് അല്പ്പം വെള്ളമെടുത്ത് കുടിച്ച് തിരികെപ്പോന്നു.

ചാമയും,എള്ളും, മുതിരയും, നെല്ലും അങ്ങിങ്ങു കൂടിക്കിടക്കുന്ന ചാണകം തേച്ച ഒരു നടുമുറ്റം പന്തലിച്ചുമുറ്റിയ ഒരു തുളസിത്തറ.പടിപ്പുരയ്ക്കിരുവശവുമുള്ള തൊഴുത്തില്‍ കുറെ പൈക്കളും രണ്ടേറ് പോത്തും.ആന പടിഞ്ഞപോലെ കിടക്കുന്ന വൈക്കോല്‍ തുറുകള്‍,മുറ്റത്തും പറമ്പിലും പണിക്കാരുടെ ബഹളം. ആ മുറ്റത്തേയ്ക്കു കാലുവയ്ക്കുമ്പൊഴേ ചാണകം മെഴുകിയ മുറ്റത്തിന്റേയും,പശുക്കളുടേയും ധാന്യങ്ങളുടേയും,മണമായിരിക്കും പൈക്കിടങ്ങള്‍ അങ്ങിങ്ങ് ഓടിക്കളിക്കുന്നുണ്ടായിരിക്കും.തൊടി മുഴുവന്‍ പ്ലാവിന്റേയും പന്തലിച്ചു നില്‍ക്കുന്ന ഒരു മാവിന്റേയും തണലാണ്.അടിച്ചു തളിച്ചിട്ടിരിക്കുന്ന നടവഴിക്കിരുവശവും മുല്ല,നന്ത്യാര്‍വട്ടം,കോളാമ്പിച്ചെടികള്‍,കൂവളം കര്‍പ്പൂരതുളസി മുതലായവയും ഓണക്കാലത്ത് മാവേലിയെത്തും മുന്നേ കിരീടം ചൂടി നില്‍ക്കുന്ന ചെട്ടിപ്പൂക്കളുടെ ചെടിയുമാണ്. മുറ്റത്തെപ്പൊഴും പയറോ,കയ്പ്പക്കയോ,തൈരിലിട്ട മുളകോ ഒന്നുമില്ലെങ്കില്‍ അരിമാവുകൊണ്ട് കൊണ്ടാട്ടത്തിനുള്ള വക ഉണക്കാനിട്ടിരിക്കും.അതിലൊന്നും കണ്ണുടക്കാതെ,തുളസിത്തറയില്‍ തൊടാതെ വേണം ചെല്ലാന്‍ ചെന്ന് മോരിനുള്ള സ്റ്റീല്‍ പാത്രം കട്ടിളപ്പടിയില്‍ കമിഴ്ത്തി വെയ്ക്കണം.

"അമ്പ്രാളേ.........., അമ്പ്രാളേയ്.."

"ആരാ അവടെ?...ഏ ആരാന്ന്."

"ഞാനാ... ഒര് നാഴി മോര് വേണംന്ന് പറഞ്ഞു അമ്മ."

"ആ.... ദാവരണു. കാശ് കൊണ്ടന്നട്ട് ണ്ട്രാ... ഇന്നാളത്തെ അമ്പത് കാശ് നിക്കണ്ട്.അമ്മ പറഞ്ഞ്വോ"

"പറഞ്ഞു കൊണ്ടന്ന് ട്ട് ണ്ട്."

അകത്തു നിന്നും തട്ടലും മുട്ടലും കേള്‍ക്കാം കാണാന്‍ പറ്റില്ല നിറയെ ഇരുട്ടാണ്.ഉമ്മറത്തേയ്ക്കൊന്നുംകയറാന്‍പാടില്ല,
അയിത്തമാവും. ഒരു തൂക്കു വിളക്കു കിടക്കുന്നുണ്ട് കട്ടിളയോറ്റു ചേര്‍ന്ന് ഒരു ഭസ്മക്കൊട്ടയും. നീണ്ട ഇടനാഴിയിലേക്ക് ഏന്തിവലിഞ്ഞു നോക്കിയാല്‍ ഉണങ്ങിയ വാഴപ്പോളകളില്‍ തൂങ്ങുന്ന സ്വര്‍ണ്ണനിറമുള്ള വെള്ളരികളും,മത്തനും കുമ്പളവുമെല്ലാം കാണാം.

"ആയ് എന്തായീ കാട്ടണെ? അവട്യൊക്കെ അശുദ്ധാക്ക്വൊ ചെക്കാ,നിക്ക് വയ്യ ഇനി കുളിക്കാന്‍ ഊം,പാത്രട്ത്ത് പിടിച്ചേ."

പാത്രം താഴ്ത്തിപ്പിടിക്കണം അവരുടെ പാത്രത്തില്‍ തൊട്ടാല്‍ അയിത്തമാണത്രേ.അമ്പ്രാളുടെ കയ്യ് വെളിച്ചപ്പാടിന്റെ കൈ പോലെ വിറയ്ക്കും പൂച്ചയെ കൊന്നതുകൊണ്ടാണെന്ന് എല്ലാവരും പറയും.
കുറച്ചു മോരു പുറത്റ്റും പിന്നെ അകത്തുമായി വീഴും

"കുട്ട്യെ പാത്രെളക്കാണ്ട് പിടിക്കു..അതപ്പടി കളഞ്ഞു ചെക്കന്‍."

പൈസ കൊടുക്കുന്നതും അങ്ങനെയാണ്.കട്ടിള അരയേക്കള്‍ ഉയരത്തിലായതുകൊണ്ട് പെരുവിരലില്‍ ഏന്തി വലിഞ്ഞു നിന്നു വേണം കാശു കൊടുക്കാന്‍. അവര്‍ മലര്‍ത്തിക്കാണിക്കുന്ന വിറയ്ക്കുന്ന കയ്യിന്റെ അടയില്‍ എത്ര ഏന്തിവലിഞ്ഞു നിന്നാലും മിക്കവാറും കാശു വീഴില്ല.

കയ്യും കാലുമില്ലെങ്കിലും കാലത്തിനു വേഗമില്ലെന്നാരും പറയില്ല.ജീവിതത്തിന്റെ സ്വയം മറന്ന ചടങ്ങുകള്‍ക്കിടയില്‍ വിവാഹവും കുടുമ്പവും എന്ന സങ്കല്പ്പം അവര്ക്കൊരിക്കലും ഉണ്ടായിരുന്നിരിക്കില്ലേ എന്ന് അത്ഭുതം തോന്നുന്നു.പരന്നുകിടന്നിരുന്ന സ്വത്തുവകകള്‍ അനുഭവിക്കാന്‍ മക്കളില്ലാതെ പോയി അവിടെ എല്ലാര്‍ക്കും.മക്കളെപ്പോലെ കൊണ്ടു നടന്നിരുന്ന അയിത്തവും ശുദ്ധിയുമൊക്കെ കാലം ഒരു വികൃതിപ്പയ്യനെപ്പോലെ തട്ടിയെറിഞ്ഞു കളഞ്ഞു. അല്ലെങ്കില്‍ വാര്‍ദ്ധക്യത്തില്‍ ഏറ്റി നടക്കാന്‍ വയ്യാത്തത്ര ഭാരമുള്ള അത് അവര്‍ ജീവിതയാത്രയുടെ പെരുവഴിയിലെവിടേയോ ഉപേക്ഷിച്ചു.ഭാരിച്ച സ്വത്തു വകകളെല്ലാം വകയിലെ തലമുറകള്‍ക്കു കൈമാറി അകമ്പടിയും സേവക്കാരുമായി കാലത്തിന്റെ സേവകന്റെ ആഗമനവും പ്രതീക്ഷിച്ച് അവര്‍ രാപകലുകള്‍ തള്ളി നീക്കുകയാണ്. ഇടയ്ക്ക് പാതിരാത്രികളില്‍ ഒരു നിലവിളിയുയരുമ്പൊള്‍ ഉള്ളില്‍ ഒരാന്തലോടെ പടികള്‍ക്കുമീതെ പറന്നിറങ്ങി പാഞ്ഞു ചെല്ലുമ്പോള്‍ വായു വലിച്ച് അല്ലെങ്കില്‍ അബോധാവസ്ഥയില്‍ മരണാസന്നരായി കട്ടിലില്‍ ഒരു കനമുള്ളതുണി ചുരുട്ടിയിട്ടതു പോലെ അവര്‍കിടക്കുന്നുണ്ടായിരിക്കും ഉന്തിയ പല്ലും കണ്ണീരൊലിച്ചുമൊളിയടര്‍ന്ന കണ്‍തടങ്ങളുമായി.കയ്യിലെടുത്താല്‍ കഷ്ടിച്ച് പത്തുമുപ്പതു കിലോ ഭാമേകാണൂ.അയിത്തത്തിന്റെ ഒരു കനം ഒരിക്കല്‍ പോലും തോന്നിയിട്ടില്ല.പാതിരാ കഴിഞ്ഞോ പുലര്‍ച്ചയോ എത്തി കിണറ്റില്‍നിന്നു വെള്ളം കൊരുന്ന ഒച്ച കേട്ടാല്‍ അച്ഛനുണരും.

കുളികഴിഞ്ഞു വരുമ്പോള്‍ ഉമ്മറത്തെ തിണ്ണയില്‍ ആലോചനയിലാണ്ട് അച്നിരിക്കുന്നുണ്ടാകും.

"എവട്യാ ആക്കീത് ടാ....?"

"മെഡിക്കല്‍ കോളേജില്. അത്താണി."

"ഊം"......... "കൊറവായോ?"

"ഇപ്പൊ കൊഴപ്പല്യ രണ്ടീസം കഴിഞ്ഞ് കൊണ്ടുപോവാം ന്നാ പറഞ്ഞത്."

ആ മൂളലില്‍ ചിലതുണ്ട്. എല്ലായ്പ്പോഴും പറയില്ല എങ്കിലും പറ്റെ മുട്ടിയാല്‍ അല്പം സങ്കടത്തോടെ പരിഭവം കലര്‍ത്തിത്തന്നെ അച്ഛന്‍ പറയും...

"നീ എവടയ്ക്കാങ്ങനെ ജീവന്‍ കളഞ്ഞ് പായണെ? ഇപ്പൊ എല്ലാര്ക്കും ആവശ്യായി.പണ്ട് ചോന്റെ ചെക്കനെ തൊട്ടാ അയിത്താര്ന്നു.ഇപ്പൊ ആര്ക്കും അയിത്തൂല്യ ചിത്തൂല്യ.ഓര്‍മ്മീണ്ടൊ ഗ്രാമസ്സേവന്റെ പടിയ്ക്കല് എട്ടു വയസ്സുള്ളപ്പോ നീ വീണ് കയ്യൊടിഞ്ഞ് കെടന്നതൊക്കെ? ഞാനൊന്നും പറേണില്യ.ഒക്കെ അവനോന്റെചിതം അച്ഛന്‍ പറഞ്ഞ് മൊടക്കീന്ന് പറയണ്ട,ന്നാലും പറഞ്ഞൂന്ന് മാത്രം."

എന്തു പ്രാന്തിനാണ് ഉണ്ണുന്നിടത്തുനിന്നും ഉറങ്ങുന്നിടത്തുനിന്നും എണീറ്റ് പോകുന്നത് എന്നു ചോദിച്ചാല്‍ അതിന് ഉത്തരമൊന്നും കിട്ടില്ല എന്നാലും നമ്മുടെ സാനിധ്യത്തില്‍ ഒരു നിസ്സഹായത ചുമ്മാ കണ്ടു നില്‍ക്കാന്‍ കഴിയാത്തതു കൊണ്ടാവാം.

കണ്ടില്ല എന്നങ്ങു വച്ചാല്‍ മതി ഒരു പ്രശ്നവുമില്ല വേണമെങ്കില്‍ ഇങ്ങനെ ഒരു കവിതയെഴുതാം.നമ്മുടെ കടമതീര്‍ന്നു എന്നു കരുതാം.പിന്നെയും പോകുമ്പോള്‍ ആരെങ്കിലും വന്ന്

"അതേയ്...ഈ റിപ്പോര്‍ട്ടു കണ്ടോ?"എന്നു ചോദിച്ചാല്‍ എന്തു ചെയ്യും?

“എനിക്ക്,..... എനിക്കിഷ്ടമായിരുന്നു.”

2008-08-06T00:00:00.000+04:00

ഒടുവില്‍ ഒരു പേജില്‍ 'ഇഷ്ടമാണ്'എന്നു മാത്രമെഴുതി എഴുത്തു പരിപാടി അവസാനിപ്പിക്കാന്‍ തീരുമാനിച്ചു. പ്രശ്നം ഇതു മാത്രമാണല്ലോ അവളെ എനിക്കിഷ്ടമാണ് അതങ്ങു നേരെ പറയാ നൊരു .... ഒരു....എന്താ പറയുക ഒരു...ഇത്. ഒരു കടലാസുകഷ്ണം കൊണ്ട് പ്രശ്നം അങ്ങു തീര്‍ത്തേക്കാം.തെറിയൊന്നുമല്ലല്ലോ ഇഷ്ടമാണ് അത്രമാത്രം.
പടിയിറങ്ങുമ്പോള്‍ വലതു വശത്തായി അമ്മ തടമെടുത്തു വെള്ളമൊഴിച്ചു വളര്‍ത്തുന്ന നന്ത്യാര്‍വട്ടച്ചെടിയുണ്ട്.ഏതു കാലത്തും അതില്‍ പൂവിനു പഞ്ഞമുണ്ടാവാറില്ല.നേര്‍ത്ത സുഗന്ധം,വെണ്മ,ജാഡകളില്ലാത്ത ലാളിത്യം നന്ത്യാര്‍ വട്ടം. പുലര്‍ച്ചെ കുളിച്ച് കുറുനിരകളിലും കണ്ഠത്തിലും വാര്‍മുടിത്തുമ്പിലും ജലകണങ്ങളലങ്കരിക്കുന്ന നാടന്‍ പെണ്‍കിടാവിന്റെ കാന്തിയോടെയാണു നില്പ്പ്.ചിലദിവസം നീഹാരമണിഞ്ഞു നില്‍ക്കുന്ന പൂവിനെ അവളുടെ മുഖകാന്തിയോടു സങ്കല്പ്പിച്ചു നോക്കും വെറുതെ.ഒരു പൂ എന്നും പറിക്കും അവള്‍ക്കു കൊടുക്കാനാണ്. അതെങ്ങനെയാ വെറുതെ ഒരു പൂ കൊടുത്ത് ഇതെടുത്തോളൂ എന്നു പറയുന്നത്, അവളുടെ മുടിത്തുമ്പില്‍ സ്വതവേ എന്തെങ്കിലും നാട്ടു പൂക്കളുണ്ടാവാറുണ്ട്.തുളസിക്കതിരോ,പാരിജാതത്തിന്റെയോ തെച്ചിയുടേയോ ഇതളുകളോ മറ്റുമായി.കാലത്ത് ലോത്തിക്കാവില്‍ തൊഴാന്‍ കയറുന്നുണ്ടാവണം.എന്തായാലും ഇന്നെങ്കിലും ഇതു കൊടുക്കണം വെറുതെ'ഇഷ്ടമാണ്'എന്നു മാത്രം കുറിച്ച ഒരു കടലാസിനൊപ്പം ഒരു പൂ കൂടി.

പഴൂര്‍ പുഴയുടെ പാലത്തിന് വീതി വളരെ കുറവാണ് പാലം നിറയെകുണ്ടുംകുഴിയും.ഇരു വശത്തും തുരുമ്പിച്ചു വളഞ്ഞ കൈവരികളാണുള്ളത്.കിഴക്കുനിന്നു വരുന്ന പുഴയെ പാലത്തിന്റെ തൂണ്‍ വെറുതെ പകുത്തു വിടും ഇപ്പുറത്ത് പിരിഞ്ഞിരുന്ന ഒരു നിമിഷത്തിന്റൊവേശത്തില്‍ തൂണിനെയൊന്നു പരിഹസിച്ചൊരു ചിരിയോടെ ചുഴിയോടു കൂടെ ഒന്നായി ഒഴുകും.അല്പമൊഴുകിയാല്‍ ഒരു തടയണയാണ്.വേനലില്‍ വെള്ളം കിട്ടാന്‍ വേണ്ടി പഞ്ചായത്തു പണിതിട്ടിരിക്കുന്ന കരിങ്കല്‍തിട്ട.അവിടെനിന്ന് ചെറിയൊരാരവത്തോടെ താഴേക്കു വെള്ളം പതിക്കുന്ന ഒച്ച കേള്‍ക്കാം. നിത്യവും അവള്‍ക്കു കൊടുക്കാനായി പറിക്കുന്ന നന്ത്യാര്‍ വട്ടപ്പൂക്കള്‍ പാലത്തില്‍ വച്ച് അവള്‍ കടന്നു പോയിക്കഴിഞ്ഞാല്‍ പടിഞ്ഞാറേ കൈവരിയില്‍ പിടിച്ച് താഴേയ്ക്കിടും അത് ഒഴുകി ആ കെട്ടിനപ്പുറം മറയുന്നതുവരെ വരെ നോക്കി നില്‍ക്കും.ആ തടയണയ്ക്കപ്പുറം പുഴയുടെ ഇരു വശവും വലിയ പുല്ലുകളും കൈതക്കാടുകളുമാണ് കുറച്ചകലെ പുഴയുടെ മധ്യത്തിലായി വലിയ ഒരു കല്ലു നില്‍ക്കുന്നുണ്ട് അതിനപ്പുറം പുഴയുടെ ഒഴുക്കിനെ കാഴ്ച്ചയില്‍ നിന്നു മറച്ചു കൊണ്ട് അഹങ്കാരത്തോടെ.
അല്പം നേരത്തെയിറങ്ങിയ ഒരു ദിവസം പാലത്തിന്റെ മുകളിലൂടെ നടന്നുകൊണ്ടവള്‍ വരുന്നതു കണ്ടു പിന്നീട് ഞാന്‍ ഇറങ്ങുന്ന സമയം അല്പം നേരത്തെയാക്കുകയാണു ചെയ്തത്. മിക്കവാറും ആരും ആ സമയത്തു പാലത്തില്‍ ഉണ്ടാകാറില്ല അവള്‍ നേരെ നടന്ന് എന്നെ കടന്നുപോകും. ചിലപ്പോള്‍ യാദൃശ്ചികമായി മുഖത്തേയ്ക്കൊന്നു നോക്കും അതിനു കുറേ അര്‍ത്ഥങ്ങള്‍ നിര്‍വചിച്ച് രണ്ടു ദിവസം ഞാന്‍ നേരം കളയും. പാലത്തിന്റെ അങ്ങേയറ്റത്തു വച്ച് അവള്‍ തിരിഞ്ഞു നോക്കും എന്നൊരു പ്രതീക്ഷയില്‍ ഞാനൊന്നു തിരിഞ്ഞുനോക്കും.അവള്‍ ഒന്നുമറിയാത്തപോലെ പോകും.എങ്കിലും പാലത്തില്‍ വച്ച് അവളെന്നെകടന്നു പോകുന്ന ആ രണ്ടു നിമിഷം ഹൃദയം ഒരു കാന്തമായിത്തീരുന്നുണ്ടോ എന്നു തോന്നും അല്ലെങ്കില്‍ എന്തായിരിക്കും അത്രയും ശക്തമായൊരു ചലനം ഹൃദയത്തില്‍ സൃഷ്ടിക്കുന്നത്?.

എന്നത്തേക്കാളും ഹൃദയം വല്ലാതെ മിടിച്ചു. എന്നത്തേയും പോലെയല്ല ഒരു ഇളം ചൂട് മേല്‍നിറയുന്നതു പോലെ.

ശബ്ദമെങ്ങാന്‍ വിറയ്ക്കുമോ ഏയ്.

വെറുതേ പോകുന്നൊരു പെണ്‍കുട്ടിയോട് ഇഷ്ടമാണ് എന്നൊക്കെയങ്ങുപറയുന്നത് ശരിയാണോ,

അതൊന്നും ഓര്‍ക്കേണ്ട ചുമ്മാ ഒരുവാക്കുമാത്രമടങ്ങിയൊരു കുറിപ്പും ഒരു നന്ത്യാര്‍ വട്ടപ്പൂവും കൊടുത്തെന്നു വച്ച് എന്താണ്.?

അവള്‍ അടുത്താണ് ഇന്നും ഇപ്പൊഴും പറഞ്ഞില്ലെങ്കിലിനി എപ്പൊഴാണ്.

വെറുതെ അവളുടെ മുഖത്തേയ്ക്കൊന്നു നോക്കി അവളും യാദൃശ്ചികമായാണോ നോക്കിയത് നേരെ കണ്ണുകളില്‍ ദൃഷ്ടി പതിയുന്നത് ഒരു വല്ലാത്ത അവസ്ഥയാണ്.മനസ്സിലുള്ളത് നാമറിയാതെ ചോര്‍ന്നു പോകും. അതു കൊണ്ട് അല്പം ധൃതിപ്പെട്ടെങ്കിലും പതുക്കെ പറഞ്ഞു.

“ഹലോ...ഗുഡ്മോണിംഗ്”
.
“ഗുഡ് മോണിംഗ്”........ വളരെ സൗമ്യമായി അവള്‍ പറഞ്ഞു.

എന്റെ മുഖത്തരു പുഞ്ചിരിയുണ്ടായിരുന്നോ എന്നെനിക്കറിയില്ല അവള്‍ ചിരിച്ചു കൊണ്ടാണു പറഞ്ഞത്.ഇടതു കവിളില്‍ ഒരു ചെറു നുണക്കുഴി വിടര്‍ന്നിരുന്നു.കണ്ണുകളില്‍ ഒരു പ്രകാശമുണ്ടായിരുന്നു.ഇത്രയും സൗമ്യമായി പ്രതികരിക്കുന്നൊരാളാണൊ ഇന്നലെ വരെയൊന്നു പുഞ്ചിരിക്കുക പോലും ചെയ്യാതെ എന്നെ കടന്നു പോയിരുന്നത്.

“എവിടെയാ പഠിക്കുന്നത്?”

“പട്ടാമ്പി..”

“പേര്..?”

“മായ....”

“ഇയാള്‍ടെ പേരെന്താ...”

“പ്രദീപ്.”…………….പിന്നെ,.

പിന്നെന്താ?.. അവള്‍ അതേ ചിരിയോടെ ചോദിച്ചു.

അല്ല,വീട് എവി..ടെ..യാന്നു...

“ഇവിടടുത്താ അമ്പലത്തിന്റവിടന്ന് അല്പദൂരം. പോട്ടെ ബസ് വരാറായിട്ടുണ്ട്.”

“ശരി...ബൈ....”

ശ്ശെ, ഇത്ര മര്യാദയായി ഇടപെടുന്നൊരു കുട്ടിയോട് ഇത്രനാളും ചുമ്മാ ഗൗരവം നടിച്ചു നടന്നു എന്നോര്‍ത്തപ്പോള്‍ ചമ്മല്‍ തോന്നി.പോക്കറ്റില്‍ കിടന്ന ഒറ്റവരിയെഴുതിയ കടലാസ് എടുത്തു നന്ത്യാര്‍വട്ടപ്പൂ അതില്‍ വച്ച് പാലത്തിന്റെ കൈവരിയോടടുത്തു നിന്ന് പുഴയിലേക്കിട്ടു...

“ദീപു..”

അവള്‍ തിരിഞ്ഞു നിന്നു വിളിച്ചു...

“അതു കളഞ്ഞോ...”

അയ്യൊ!

വെപ്രാളത്തോടെ താഴേയ്ക്കു നോക്കി കടലാസിന്റെ മധ്യത്തില്‍ വെള്ളം നനയാതെ ആ നന്ത്യാര്‍ വട്ടപ്പൂ ഓളങ്ങളില്‍ തങ്ങി യാത്ര തുടങ്ങിയിരുന്നു.

“ഏയ്...അത്....അതൊരു നന്ത്യാര്‍ വട്ടപ്പൂവ്വാണ്... മായക്കിഷ്ടമായില്ലെങ്കിലോ എന്നു കരുതി.....”

“എനിക്ക്,..... എനിക്കിഷ്ടമായിരുന്നു."

അതു പറയുമ്പോള്‍ അവളുടെ കവിളുകള്‍ ശോണിമയാര്‍ന്നു തുടുത്തിരുന്നു,കണ്ണിലൊരു തെളിച്ചം നിറഞ്ഞിരുന്നു,പുഞ്ചിരിയില്‍ ഒരു അപൂര്‍വ്വഭാവം കലര്‍ന്നിരുന്നു.വാക്കുകള്‍ ചിലപ്പോള്‍ സൃഷ്ടിക്കുന്ന പ്രപഞ്ചത്തെകുറിച്ച് വര്‍ണ്ണന അസാധ്യമാണ്.അതില്‍ നിന്നുമുണര്‍ന്ന്
വീണ്ടും താഴേക്കു നോക്കുമ്പൊള്‍ തടയണയില്‍ നിന്ന് ആ പൂവ്വും കടലാസും ഒരു മിന്നായം പോലെ താഴേക്കു പതിയ്ക്കുന്നതു കണ്ടു. തിരിഞ്ഞു നോക്കിയപ്പോള്‍ അവളും കാഴ്ചയില്‍ നിന്നു മറഞ്ഞിരുന്നു പാലം കഴിഞ്ഞ് വലത്തോട്ടുള്ള തിരിവിനെ മറയ്ക്കുന്ന കവുങ്ങിന്‍ തോപ്പിനുള്ളിലൂടെ അവളെ ഒന്നു കൂടി കാണുമെന്നു വെറുതെ പ്രതീക്ഷിച്ചു.

പിറ്റേന്ന് ചേച്ചി ഓമനിച്ചു വളര്‍ത്തുന്ന പനിനീര്‍ചെടിയുടെ ഏറ്റവും തുടുത്ത പൂവും കൊണ്ട് ഞാനവിടെ കാത്തുനിന്നു.
പിന്നെയും കുറെ നാള്‍.
അനുഭവങ്ങളുടെ കുത്തൊഴുക്കില്‍ സ്മരണകളുടെ തടയണകളെല്ലാം കുതിര്‍ന്നിടിഞ്ഞു പോയി.
മായ...
പതഞ്ഞൊഴുകുന്ന പുഴകാണുമ്പോള്‍,മഞ്ഞണിഞ്ഞു നില്‍ക്കുന്ന നന്ത്യാര്‍വട്ടപ്പൂക്കളെക്കാണു-
മ്പോളൊക്കെ മാത്രം തുടിയ്ക്കുന്ന ഒരോര്‍മ്മയും.

ബൂലോക മലകളുടെ പ്രസവം.

2008-07-17T02:21:00.000+04:00

ഒരു ദിവസം നേരം പുലര്‍കാലേ വലിയ ഒച്ചയും വിളിയും ബഹളം പരക്കമ്പാച്ചില്‍ നാട്ടുകാരോടിക്കൂടുന്നു
ദേ കിഴക്കന്‍ മല മുക്കുന്നു,മൂളുന്നു,ഞരങ്ങുന്നു ഞെളിപിരികൊള്ളുന്നു.കണ്ടവര്‍ കണ്ടവര്‍ മൂക്കത്തു വിരല്‍ വെച്ചും തലയ്ക്കു കൈവച്ചും ഓരോരോ അഭിപ്രായം കാച്ചി വിടുന്നു.

''ആ മുക്കലും മൂളലുമൊക്കെ കണ്ടിട്ട് ഒരാനക്കുട്ടീന്യങ്കിലും പെറണ ലക്ഷണ്ടലോ'' അനവധി പേറെടുത്ത വയറ്റാട്ടിത്തള്ള പറയും

ഏയ് ആനക്കുട്ട്യൊന്ന്വല്ല വല്ല പോത്തും കുട്ട്യോ പൈക്കുട്ട്യോറ്റെ ആവും വടക്കേലെ അമ്പ്രാള് അതും പറഞ്ഞ്
ഊരയും വെട്ടിച്ച് നടന്നു പോവും.

"ഇത് ലക്ഷണം കണ്ടിട്ട് ഒരെത്തും പിടീം കിട്ട് ല്യല്ലോ ദൈവേ''ന്നും പറഞ്ഞ് പാടത്തെ പണിക്കാരും പോയിക്കഴിഞ്ഞാവും കെഴക്കേ കരേമ്മെയുള്ള കുംഭാരന്‍ ഗോയിന്നനും,കോവാലനും കവുങ്കിന്റെ അലകു കൊണ്ടുണ്ടാക്കിയ കൊട്ടയില്‍ തായ മുറിഞ്ഞ മഴുവും കുറച്ചു വള്ളിയും തെരികയും വൈക്കോലുമായി രണ്ടുമൂന്നു കുംഭാരത്തികളും,ഉന്തിയ വയറിനു മീതെ കാട്ടുചേനത്തണ്ടിന്റെ പുള്ളി പോലെ ചുണങ്ങുള്ള,മൂക്കൊലിപ്പുള്ള കുറേ ചറുങ്ങു പിറുങ്ങു പിള്ളാരും പിന്നെ മുരിങ്ങക്കോലു പോലെ വാലും കറുത്ത മോന്തയും ഉണങ്ങിയ ശരീരവുമുള്ള ചൊടിയുള്ള നാലഞ്ചു പട്ടികളേയും കൊണ്ട് കാട്ടിലേയ്ക്കു പോണത്.

യേന്ത് കൂട്ടാണ് ആവ്ടെ ഓര് തീക്കും തേറ്ക്കും കാണ് ണ്.......

വെള്ളൂ.....പാണ്ടാ....ചൂട്ടാ ഓട്റാ.........ദൂശ്റാ ദൂശ്റാ........

കല്പന കേള്‍ക്കുന്നതും കുംഭാരന്റെ പട്ടിപ്പട കുതിക്കും മലയുടെ അടിവാരം മാന്തി മറിക്കാന്‍ തുടങ്ങും

കുംഭാരത്തികള്‍ വയ്ക്കോല്‍ത്തുറുവില്‍ മുളകുതിരുകി അടുത്തടുത്ത മടകളിലെല്ലാം തിരുകി പുകയൂതുന്നു
മലയാകെ ഇളകീട്ടും കുമ്പാരര്‍ക്കെന്ത്!

ആകാംഷയുടെ പരകോടിയില്‍ നാട്ടുകാര്‍ നോക്കിനില്‍ക്കേ പാണ്ടനും ചൂട്ടനും വാശിയോടെ മണ്ണു മാന്തുന്നു....

ഗോയിന്ന,കോവാല,കളത്രപുത്ര ശുനകാദികളുടെ അലര്‍ച്ച ബഹളം...

ദ്ദൂശറാ..............പാണ്ടാ...............ദ്ദൂശറാ.....

പെട്ടന്ന് വല്യോരു......

എന്നു വച്ചാല്‍ വല്യവല്യോരു

തൊരപ്പനെലി ചാടുന്നു

ഒറ്റച്ചാട്ടത്തിനതു പാണ്ടന്റെ കടിയില്‍ കീ.......................എന്നൊരു ശബ്ദത്തോടെ ഞരങ്ങുന്നു.

അന്തം വിട്ടുനിന്നവരെല്ലാം വിട്ട അന്തമെല്ലാം അടിച്ചുകൂട്ടി മടിശ്ശീലയിലിട്ട് തല്‍ക്കാലം പഞ്ചായത്തു കെണറ്റില്‍നിന്നു വെള്ളം കോരാനും
ഷാപ്പില് ഹാജരുവെയ്ക്കാനും ധൃതിപ്പെട്ടു പോവുന്നു.ഇതു ഭൂ ലോകത്തൊരു സ്ഥിരം കാഴ്ച്ച.

കാഴ്ചകള്‍ കണ്‍ടുകണ്ട് ചെന്നു കയറിയതാവട്ടെ മറ്റൊരു ബൂലോകത്ത്.
അവിടേം സ്ഥിതി തഥൈവ......എന്നു പറയാന്‍ പറ്റില്ല എന്നാലും ഇടയ്ക്കൊക്കെ ഒരു ഞെരിപിരി എരി പിരി സഞ്ചാരം കുംഭാരനെ തിരിഞ്ഞു നോക്കി എവിടെ ! ബൂലോകത്തെന്തു കുംഭാരന്‍?

അപ്പൊ പിന്നെ കാത്തിരിപ്പുതന്നെ ശരണം.
ഒടുവില്‍ ബൂലോക മലപെറ്റു വല്യൊരു വല്യ വല്യൊരു കൊപ്പര.
ഒന്നല്ല ദിവസേന പെറ്റു ,പോര ഓരോ മണിക്കൂറിലും പെറ്റു എന്നു പറയുന്നതാവും ശരി.ഒടുവില്‍ കുറേപ്പേര്‍ കൂടി കൊപ്പരയൊന്നാട്ടി നോക്കി.

ഹും! പിണ്ണാക്കിന്റെ ഗുണം പോലുമില്ലാത്തകൊപ്പര എന്ന് എഴുതിത്തള്ളി‌‌‌‌‌‌.
----സ്യ ഗുണസ്യ എന്നൊരു വെറും ചൊല്ലല്‍ പോലായി കാര്യങ്ങള്‍,ഇപ്പഴും ദിവസേനെ ഒരു കൊപ്പരവീതം ആ മല പെറും.

പിന്നെ ദേ വരുന്നു പേറുമുറ്റിയമലകള് വരിവരിയായി......
ബൂലോകം ഗവര്‍മ്മെണ്ട് ആശുത്രീലെ പ്രസവവാര്‍ഡായി മാറി എന്നു തോന്നാന്‍ തുടങ്ങി.

ഓരോ മുക്കിനും ഓരോന്നു പെറുന്നു....... മരഞ്ചാടിയായും,വാല്‍മാക്രിയായും,മണ്ണാങ്കട്ടയായും,വിരൂപനായും,കുടിലനും, കൂശ്മാണ്ഡനും,കുരുടനുമായവവരെ പിറന്നു വീണുകൊണ്ടേയിരിക്കുന്നു........
ഇനിയും അവസാനിക്കാത്ത പ്രവാസം എന്നൊക്കെ പറയുമ്പോലെ.........
ധാരാവി ധാരാവി....എന്നൊക്കെ വെറുതെ ഓര്‍മ്മവരുന്നു.

എനിക്കു വേണ്ടി പെയ്ത മഴയ്ക്ക്.

2008-06-23T17:29:00.000+04:00

ആദ്യത്തെ പരീക്ഷണ പ്രവാസത്തിന്റെ ഒന്നര വര്‍ഷത്തിനു ശേഷം,പ്രവാസം ഇനി ജീവിതത്തിലില്ലെന്നുറച്ച് വീട്ടിലെത്തിയത് ഒരു ജനുവരിമാസത്തിന്റെ മദ്ധ്യത്തിലായിരുന്നു.കനലുകള്‍ കുറെ വീണു പൊള്ളിയ ഉള്ള് എങ്ങനെ തണുക്കും എന്നാലോചിച്ചിരുന്നില്ല.

നീല പ്ലാസ്റ്റിക്കു കസേരയില്‍ കാലു രണ്ടും തിണ്ണയില്‍ കയറ്റിവച്ച് ഭാവിയിലേക്കെന്നപോലെ വിദൂരതയുടെഅനിശ്ചിതത്വത്തിലെവിടെയോ നോക്കി ഉള്ളില്‍ തിങ്ങുന്ന പറയാനാവാത്ത ഒരു വിഷമത്തോടെ ഞാനിരുന്നു.തെളിഞ്ഞ ആകാശം മകരമാസാരംഭമാണെന്നു തോന്നുന്നു
ചെറിയ മുറ്റം കളം പണികഴിഞ്ഞിട്ട് ചാണകം തേച്ചിട്ടിരുന്നു.വെയില്‍ അല്പം ചൂടു പിടിച്ചു തുടങ്ങിയിരുന്നു.
മുഷിഞ്ഞമനസ്സിനൊപ്പം പുഴുകുന്ന ചൂടും കൂടിയായപ്പോള്‍ ഇട്ടു വന്ന ഷര്‍ട്ടഴിച്ച് ഉമ്മറത്തെ ടേബിളിലിട്ടു അമ്മ അതെടുത്ത് അകത്തു പോയി,അമ്മയ്ക്കറിയാമായിരിക്കാം അതാവാം അമ്മ തെല്ലു വിശേഷാന്വേഷണങ്ങള്‍ക്കപ്പുറം ഒന്നും ചോദിക്കാതിരുന്നത്.

വിദൂരമെന്നു തോന്നിയ ദിക്കില്‍ പെട്ടന്ന് ഇരുണ്ട
കാര്‍മേഘങ്ങളുയര്‍ന്നു നിമിഷങ്ങള്‍ക്കകം ചിന്തയുടെ ഏകാന്തതടവിന്റെ കവാടങ്ങള്‍ തുറക്കപ്പെട്ടു,പതിവു ബഹളങ്ങള്‍ കേട്ടു തുടങ്ങി.അച്ഛമ്മയുടേയും തുടര്‍ന്ന് അയല്‍വക്കത്തുകാരുടേയും ബഹളങ്ങള്‍.പൂരങ്ങള്‍ അടുക്കാറായ സമയത്ത് ഇങ്ങനെയൊരു മഴ ആരും പ്രതീക്ഷിച്ചില്ലായിരുന്നു.ഒന്നും ഒരുക്കി വയ്ക്കാന്‍ ആര്‍ക്കും സമയം കിട്ടാന്‍ വഴിയില്ല.വെയിലത്തിട്ടിരുന്ന കൊപ്രയും പയറ്,പാവയ്ക്കാ കൊണ്ടാട്ടവുമെല്ലാം പെറുക്കി അകത്തു കയറ്റുമ്പോഴേയ്ക്കും കാവലാംചിറയുടെ പടിഞ്ഞാറേ പാടത്തിനക്കരെ നിന്നും മഴയുടെ അന്ത്യശാസനം കേട്ടു തുടങ്ങി,പെട്ടന്ന് ഒരിടിവെട്ടി.വിഷാദം ഇരുട്ടുപാവിയ മനസ്സിന്റെ ഉള്ളറകളിലേക്ക് അതിന്റെ വെളിച്ചം കടന്നിരിക്കാം ഞാന്‍ ഞെട്ടിയുണര്‍ന്നു കൈകള്‍ രണ്ടും ഒന്നു കൂട്ടിത്തിരുമ്മി ഒന്നു നിവര്‍ന്നിരുന്ന് മഴയെ കണ്‍ടു.ആണ്ടൊന്നു കഴിഞ്ഞിട്ടും ഒന്നു വിളിക്കാതെ ഒരു കുറിപ്പയക്കാതെ അവളെ കരയിപ്പിച്ചതിന് മഴയായിഎന്നോടു പകരം ചോദിക്കുകയായിരിക്കുമെന്നു തോന്നി.പടിഞ്ഞാറേ നടവഴിയിലെ കരിയിലകളിലൂടെ മഴയുടെ ചിലമ്പൊച്ച കേട്ടു.മഴ അടുത്തെത്തിയതറിഞ്ഞ് ഇനിയെല്ലാം നനയാന്‍ വിട്ട്.അച്ഛമ്മയുടെ പരിവേദനം.

ഹൗ എന്തൊരു കാലാ ത്....ങ്ങനീണ്ടൊ ഒരു മഴ പട്ടാപകല്!

ഇടതൂര്‍ന്ന കാര്‍കൂന്തലഴിച്ചിട്ട് നാലുദിക്കിന്റെയും കണ്ണുമറച്ച് സ്വകാര്യമായി ഇറയത്തു നിന്നും നനുത്ത വിരലുകളാലെന്റെ മുഖം മുതല്‍ ഒരൊറ്റ വീര്‍പ്പിനവള്‍ തലോടി.

"എറയത്ത് ഇരിക്കണ്ട ചെക്കാ വന്ന വായൂന് വെറ്തെ ശീതടിച്ച് പനി പിടിപ്പിക്കണ്ട."

മഴയെ ആസ്വദിച്ചിരുന്ന ഞാന്‍ അച്ഛമ്മയെ ഒന്നു തിരിഞ്ഞു നോക്കി.

"നോക്കിപ്പേടിപ്പിച്ചൊ തലയ്ക്കെണ്ണം വെന്ന് കെടക്കുമ്പൊ അറിയാം,.....ഞാനൊന്നും പറയ്ണ് ല്യേയ്.."

പിന്നെന്തൊക്കെയോ ഒച്ച കുറച്ചു പറഞ്ഞ് അവര്‍ അകത്തേയ്ക്കു പോയി ഞാന്‍ മഴയിലേക്കും. ഒരു നൂറു പരിഭവങ്ങള്‍ പെയ്തു തീര്‍ക്കുന്ന പോലെ എല്ലായിടത്തു നിന്നും എന്നോടു കലഹിച്ചു.കരിമ്പനത്തലപ്പുകളില്‍ പുളിമാവിന്‍ കൊമ്പുകളില്‍ താഴത്തെ വളപ്പിലെ കവുങ്ങിന്‍ തലപ്പുകളില്‍ വാശിയോടെ പെയ്തമര്‍ന്നു.
കുറെ സമയത്തിനു ശേഷം അത് ഇടയ്ക്കൊരു തേങ്ങല്‍ പോലെ ചെറുതായി.നനുത്ത മഴത്തുള്ളികള്‍ ഇഴയെടുത്തു കെട്ടിയ ഈറന്‍ മുടിത്തുമ്പില്‍ നിന്നെന്ന പോലെ എന്റെ മുഖത്തേക്കു തൂവി.അവളുടെ മനസ്സു തന്നെയായിരിക്കുമോ പെയ്തു തോര്‍ന്നത് ഇപ്പോള്‍,അതേ സ്നേഹം തന്നെയാണോ എന്നില്‍ തൂവിയിട്ടു പോയ ഈ മഴത്തുള്ളികള്‍! മനസ്സ് ഇരുട്ടില്‍ നിന്നും ഒരു പ്രകാശത്തിലേക്കു കടന്നതു പോലെ തോന്നി,മുറ്റത്തെ തെങ്ങിന്റെ വശത്തുനില്‍ക്കുന്ന മുല്ലകള്‍ക്കിടയില്‍ നിന്ന് തിളങ്ങുന്ന നീലചിറകുള്ള ഒരു ചിത്രശലഭം പറന്നുവന്ന് തിണ്ണയിലേക്കു നീട്ടി വച്ച എന്റെ കാല്‍ വിരല്‍ തുമ്പിലിരുന്നു.അത്ഭുതം തോന്നതിരുന്നില്ല എത്രമാത്രം മുഷിഞ്ഞ മനസ്സുമായാണു ഞാനിവിടെയിരുന്നത് എന്ന് ഓര്‍ക്കാന്‍ പോലുമാവാത്തവിധം മനസ്സു മാറിപ്പോയി.
അതിന്റെ ചിറകുകളുടെ ഭംഗിയില്‍ കണ്ണു നട്ടിരിക്കേ ഒരുകയ്യില്‍ കട്ടന്‍ കാപ്പിയും ഒരു തോര്‍ത്തുമായി അമ്മ വന്നു അതു കണ്ടാവണം ആ ശലഭം പെട്ടന്നു പറന്നു പോയി.

"ഒര് ഗ്ലാസ്സു കട്ടങ്കാപ്പി കുടിച്ചൊ,നിന്നെക്കാണിക്കാനാ ഇപ്പൊ മഴ പെയ്തേന്നാ തോന്നണത്.കൊല്ലം ഒന്ന് കഴിഞ്ഞില്യേ ഇവടത്തെ മഴയൊക്കെ കണ്ടിട്ട്."

തോര്‍ത്തുമുണ്ടെടുത്ത് തല അമര്‍ത്തിത്തോര്‍ത്തിത്തരുന്നതിനിടയ്ക്ക് അമ്മ പതുക്കെ പറഞ്ഞു കൊണ്ടിരുന്നു.ചെമ്പരത്തിയിട്ടു കാച്ചിയ എണ്ണ തേച്ച് കാവലാം ചിറയുടെ ആഴംകുറഞ്ഞ കടവിലെ കല്ലില്‍ നിര്‍ത്തി കുളിപ്പിച്ചിരുന്ന നാളിലെ കുട്ടിയെപ്പോലെ ഞാന്‍ കണ്ണടച്ചിരുന്നു.

കള്ളന്‍സ്.കോം.(പ്രതിഷേധം)

2008-06-11T00:00:00.000+04:00

കളവ് എന്നത്ചിലരുടെ ജന്മ വാസനയാണ്,തലമുറകളായി പകര്‍ന്നു കിട്ടുന്ന പാരമ്പര്യം.അതിനെ ചോദ്യം ചെയ്തിട്ടു കാര്യമില്ല.
അല്ലെങ്കില്‍ കുയിലുകള്‍ ഇക്കാലത്തെങ്കിലും കൂടു വയ്ക്കുമായിരുന്നില്ലേ?
പക്ഷേ കളവു കയ്യോടെ പിടിച്ചാല്‍, ചോദിച്ചാല്‍ ഭീഷണി തെറിവിളി എന്നിങ്ങനെ തുടരുന്നതു തെമ്മാടിത്തമാണ്.
പരാക്രമം സ്ത്രീകളിലല്ലവേണ്ടൂ എന്നുണ്ട്.അതിനൊപ്പം പെണ്ണൊരുമ്പെട്ടാല്‍ എന്നു കൂടി ചേര്‍ത്തു മനസ്സിലാക്കുന്നത് കള്ളന്‍സ് ഡോട് കോമിന് നന്നായിരിക്കും.
"കപ്പലകത്തൊരു കള്ളനിരുന്നാല്‍ എപ്പഴു മില്ലൊരു സുഖമറിയേണം"
എന്നു കുഞ്ചന്‍ നമ്പ്യാര്‍ പറഞ്ഞത് ഓര്‍ക്കതിരിക്കാനാവുന്നുമില്ല.

ന്നാപ്പിടിച്ചോ പുത്യേ ഭൂമി.

2008-03-27T10:32:00.000+04:00

ലോക വീക്ഷണത്തിനിറങ്ങിയ ദൈവന്‍ ദുഖഃഭാരത്താല്‍ പള്ളിപ്പാടത്തെ ആളൊഴിഞ്ഞ മുക്കവലയിലെ കവുങ്ങിന്തണ്‍ടിട്ട ബസ്റ്റോപ്പില്‍ കുന്തു കാലിലിരുന്നു। ആട്വാരന്‍ അയ്മുട്ട്യാപ്ല ഐദ്രുമാന്‍ ഗിയറില്‍ വലിച്ച് പൊള്ളിയ കൈവിരല്‍ കുടഞ്ഞപ്പോള്‍ തെറിച്ചു വീണ ബീഡിക്കുറ്റിയെ ഇടതു കാല്‍ നീട്ടി പെരു വിരലും ചൂണ്ടു വിരലും കൂട്ടിയെടുത്തു.ഹനുമാന്‍ ഗിയറില്‍ ഒന്നു കൂടിആഞ്ഞു വലിച്ചു.....

യെന്തൊക്കെ പ്രതീക്ഷകളായിരുന്നു ആറ്റു നോറ്റൊരു ഭൂമിയുണ്ടാക്കുമ്പോ।

ഓ...ക്കെ...ചളകൊള മൊളകൂഷ്യായി.....ച്ഛെ.....മോശം മഹാമോശം!!!!!!!

ഒരു പുത്തന്‍ ഭൂമിണ്ടാക്കീട്ടേ അട്ത്ത ഞായറാഴ്ച്ചേലെ ബിര്യാണിച്ചെമ്പില് തലയിട്വേള്ളൂ...അയ്മുട്ടീടെ ബീഡിക്കുറ്റിയാണേ....ദ്യേ.....കുന്തിച്ചിരിക്കണ യീ കവുങ്ങിന്തണ്ടാണേ സത്യം,സത്യം,സത്യം।

ഹും ഇത്തവണ യെനിക്കു തെറ്റു പറ്റില്ല।സമത്വസുന്ദരമായ ഒരു പുതിയ ഭൂമി ഞാന്‍ സൃഷ്ടിക്കും.ഈ കോഞ്ഞാട്ട ഷേപ്പിലുള്ള സൗരയൂഥത്തിലല്ല അതിന്റെ അപ്രത്തേന്റെ അപ്രത്ത്.

പുതിയഭൂമിയില്‍ എല്ലാറ്റിനും തുല്യനീതി,
എന്റെ സൃഷ്ടികളൊന്നും ഒന്നിനൊന്നു കുറവായിരിക്കില്ല।ആകാശത്തോളം പോന്ന ഭൂമി,ഭൂമിയോളം പോന്ന നക്ഷത്രങ്ങള്‍ അത്രതന്നെ പോന്ന ഒരു ചന്ന്രനും.വെള്ളവും കരയും സമാസമം,വേനലും മഴയും സമാസമം. ശ്ശെ അല്ലെങ്കിലെന്തിനു സമാസമമാക്കണം?....വെയിലത്തുതന്നെ മഴയും പെയ്യട്ടെ.എല്ലായിടത്തും മണ്ണിന് ഒരേനിറം,ഒരേമണം,ഒരേഗുണം.ആഹഹാ॥ഒരിടത്തുംകുണ്ടുംകുഴിയുമുണ്ടായിരിക്കില്ല.എല്ലായിടത്തും സമാസമം.പര്‍വ്വതങ്ങളെല്ലാം ഒരേ ഉയരം,കുന്നുകളും മേടുകളും ഒട്ടും താഴ്ന്നിരിക്കുകയില്ല,എല്ലാമരങ്ങളും ഒരേ ഉയരം,ഒരേവണ്ണം,കൊടിത്തൂവ്വയ്ക്കും,കൃഷ്ണതുളസിക്കും ഒരേ ഗുണം, എല്ലാ മൃഗങ്ങള്‍ക്കും ഒരേവലിപ്പം.ഒരുറുമ്പും,ആനയെ കാല്‍ക്കീഴിലാക്കരുത്.ഒരാനയുടെ ചവിട്ടേറ്റും ഒരു പ്രാണിചാവരുത്.കോഴിക്കും,കുറുക്കനും ഒരേഉയരം, നാലുകാല്, ഒരേതൂവ്വല്‍,അങ്കവാല്‍,കോമ്പല്ല്.എലിക്കും പൂച്ചക്കും തഥാ ഏന്റ് എക്സിട്രാ.....എക്സിട്രാ.........എല്ലാംകിറുകിറ്ത്യം.

പക്ഷേ മന്‍ഷ്യമ്മാരെ സൃഷ്ടിച്ചാല് സം ഗതി കൊളമാവും।അതുകൊണ്ട് പരീക്ഷണാടിസ്ഥാനത്തില്‍ ആദ്യം ഒരു പുരോഹിതന്‍,ഒരുരാഷ്ട്രീയക്കാരന്‍,ഒരുകച്ചവടക്കാരന്‍.....പിന്നെ ഒരു സാദാ പ്രജയേയും റിക്രൂട്ട് ചെയ്യാം।അതു കഴിഞ്ഞ് പൊരുത്തപ്പെട്ടു പോവുന്നതരത്തിലുള്ള രണ്ടെണ്ണത്തിനെ സൃഷ്ടിച്ചാ മതീലോ।

അപ്ലേയ്..........ശ്ശ്ശ്ശ്....

എന്താ....ടോ?

ഊളമ്പാറയ്ക്ക്...ള്ള അട്ത്ത വണ്ട്യെപ്ലാ.....ന്ന് വല്ല നിശ്ശൂണ്ടോ?

ഹും!.....ഓരോന്ന് എറങ്ങിക്കോളും മന്ശനെ ബട്ടാക്കാനായ്ക്കോണ്ട്.....യെ ബടന്ന് കുറ്റീം പറച്ച് ബരണൂ....ഇയ്യാദി ബലാലോണാവോ ന്റ റബ്ബേ............

ബാച്ചീസ് സ്പെഷ്യല്‍‍ സുഖിയന്‍

2008-03-05T12:30:00.000+04:00

ഓ ഇതത്ര കോപ്ലിക്കേറ്റൊന്നുമല്ലന്നേ സിമ്പിള്‍ വെരി വെരി സിമ്പിള്‍
താഴെക്കൊടുക്കുന്ന സാധനങ്ങളെടുത്തു വയ്ക്കൂ
ചെറുപയര്‍ - ഒരു കിലോ
ശര്‍ക്കര - രണ്ടുകിലോ
ഏലക്കായ് - നൂറു ഗ്രാം
(മുന്തിരി,അണ്‍ടിപ്പരിപ്പ്,കച്ചോലം,ഇരട്ടിമധുരം,ചോന്നെരത്ത എന്നിവ അവനവന്റെ തന്റേടത്തിനനുസരിച്ച് ചേര്‍ക്കാവുന്നതാണ്)
ഇത്രയും സാധനങ്ങളും,വായ് വട്ടം കുറഞ്ഞ ഒരു പാത്രം, വെള്ളം,സ്റ്റൗ മുതലായവയും കരുതുക
അരക്കഴഞ്ച് പരിഭ്രമം കടുകിട്ടു വറുത്തു മാറ്റിവയ്ക്കണം.
വാതിലടച്ച് ജനലയിലൂടെ പുറത്തേയ്ക്കുനോക്കി ആരുമില്ലെന്ന് ഉറപ്പു വരുത്തുക.ഭയപ്പെടേണ്ട ബാച്ചീസ് സുഖിയന് ഭയങ്കര ഏകാഗ്രത ആവശ്യമാണ്.ചായക്കട പരമനെ മനസ്സില്‍ ധ്യാനിച്ച് പയറ് അടുപ്പത്തുവയ്ക്കുക വറുത്തു മാറ്റിവച്ച പരിഭ്രമത്തില്‍ നിന്ന് ഒരു പിടിയെടുത്തിട്ട് നന്നായി ഇളക്കുക. അതിനു ശേഷം റൂമില്‍ തേരാപാരാ നടക്കുക പരമന്റെ കറുത്ത എണ്ണച്ചട്ടിയില്‍നിന്നും അര്‍മാദിച്ചു കയറിവരുന്ന പരിപ്പുവട,ഉഴുന്നുവട,മുതലായവയെ കണ്ണടച്ചു ധ്യാനിക്കണം.
ഇനി പയറിന്റെ വേവ് ഒന്നു നോക്കുക ഓ പാതിവേവായിക്കാണുമെന്നേ.
ഇങ്ങു പോരുക വീണ്‍ടും നട....ഇപ്പോള്‍ കൂട്ടത്തില്‍ പറയാത്ത ഒരു സംഭവം ചേര്‍ക്കണം.
ഒരൊന്നരെക്കിലോ കണ്‍ഫ്യൂഷന്‍,അതെങ്ങനെയാണെന്നു വച്ചാല്‍....
ഈ ശര്‍ക്കര എപ്ലാ ചേര്‍ക്ക്വാ?????
പാതി വേവിലാണോ,വെന്തിട്ടാണോ?????
വെന്തതിനു ശേഷം ചേര്‍ത്താല്‍ അയകൊയാ ന്നായിത്തീര്വോ?
ഇത് എണ്ണേല് ഇടണതും എട്ക്കണതുമല്ലാതെ ഒന്നും കണ്ടിട്ടൂല്യ..
ശ്ശോ...ഒരു കാര്യം ചെയ്യൂ. വേഗം ബാക്കി മാറ്റിവച്ച പരിഭ്രമവും ഏലക്കയയും,ഉരുക്കിവച്ച ശര്‍ക്കരയും എടുത്ത് തിളച്ചു കൊണ്ടിരിക്കുന്ന പയറിലിടൂ.
ഹാവൂ പകുതി സമാധാനമായി, ഇല്ലേ.
ഇനി പതുക്കെ ഒരു സ്പൂണിട്ട് ഇളക്കുക.....
അല്പ്പസമയത്തിനു ശേഷം നോക്കൂ ചളപളാന്നു തെളയ്ക്കുന്നതു കാണാം പത്തു മിനിട്ടിനു ശേഷം പയറിന്റെ വേവൊന്നു നോക്കൂ....
ഓ പോര, ഒന്നു കൂടി തെളയ്ക്കട്ടെ.
ഇനി സ്പൂണൊന്നിട്ടു നോക്കൂ ഇളക്കാന്‍ ചെറിയൊരു പ്രയാസമില്ലേ,കുഴപ്പമില്ല അല്പംകൂടി പരിഭ്രമം ചേര്‍ത്ത് ഇടതു കൈകൊണ്‍ട് പാത്രത്തിലൊന്നു പിടിക്കണം
ഹമ്മ്മോ.... പൊള്ളിയോ? എയ് സാരമില്ലേന്നേയ്.
സ്പൂണതിലിട്ട് ഇടതുവിരലിലൊന്നൂതുകയോ, ശ് ശ് ശൂ എന്നശബ്ദത്തോടെ നാവുകൊണ്ട് നനയ്ക്കുകയോ ചെയ്യാം. അനന്തരം ഒരു തുണിയെടുത്ത് വലതു കൈകൊണ്‍ട് പാത്രം പിടിച്ച് ഇടതുകൈകൊണ്ട് സ്പൂണെടുക്കണം ഇപ്പോഴും ശ് ശ് ശ് എന്ന ശബ്ദം പുറപ്പെടാന്‍ സാധ്യതയുണ്ട്,സാരമില്ല.
എന്തു പറ്റി? സ്പൂണെടുക്കാന്‍ പറ്റുന്നില്ലേ?
അയ്യോ പറ്റിച്ചോ!
വലതു കൈ കൊണ്ടൊന്നു ശ്രമിച്ചുനോക്കൂ... രക്ഷയില്ലാ.
ഇപ്പോ കുറേശ്ശെ പുക വരുന്നതു കാണാം സംശയിക്കേണ്ട തലയില്‍ നിന്നല്ല പാത്രത്തില്‍ നിന്നു തന്നെയാണ് സ്റ്റൗവ്വങ്ങ് ഓഫ് ചെയ്തേക്കൂ.
ഇനി അല്പ്പം വിശ്രമിച്ചുനോക്കൂ.....ഹാവൂ എന്തൊരാശ്വാസം.കൈകളില്‍ ചെറിയ നീറ്റലുണ്ടാവും,ബര്‍ണോള്‍ ഉടെങ്കില്‍ നല്ലതാണ്.കിതപ്പൊക്കെ മാറിയാല്‍ ഒന്നു ചെന്നു നോക്കുക കലത്തില്‍ നിന്നും സ്പൂണിന്റെ വാല്‍ പുറത്തേയ്ക്കുകാണാം.
ഒരു കൈകൊണ്ടെന്നെടുത്തുനോക്കൂ, പണ്ട് കല്യാണസൗഗന്ധികത്തിനു മാര്‍ഗ്ഗതടസ്സം നിന്ന ഹനുമാന്റെ വാല്‍ ‍സ്മരിച്ച് ഒന്നു കൂടിശ്രമിച്ചു നോക്കൂ. കിട്ടിയാല്‍ കിട്ടി ഇല്ലെങ്കില്‍....
ഹൊ കശ്മലന്മാര്‍ വരുന്നതിനു മുന്നേക്കൂട്ടി ചടുപിടേന്നൊരു കുളികഴിക്കുക അടുത്ത സിനിമാതിയ്യറ്ററിലേയ്ക്ക് സ്കൂട്ടാവുക മൊബൈല്‍ സ്വിച്ചോഫ് മസ്റ്റാണേ,ഇല്ലെങ്കില്‍ വരാനുള്ള തെറി എയറില്‍ തങ്ങില്ല എസ് എം എസ്സായും വരും.

പ്രണയത്തെക്കുറിച്ചു തന്നെ വീണ്ടും (വലന്റൈന്‍സ് എഡിഷന്‍)

2008-02-14T09:19:00.000+04:00

വെണ്‍മുകില്‍ മാലകളായ് വരുന്നൂ പ്രണയത്തിന്‍,
പനിനീര്‍ തൂവി വീണ്ടുമുണര്‍ത്താന്‍ കനവിനെ.

കാലത്താല്‍ കട്ടവിണ്ട മനസ്സിന്‍ പാടത്തൊരു,
ഞാറ്റുപാട്ടുയര്‍ന്നേയ്ക്കാം നാമ്പിടാം തളിരുകള്‍.

ആവണിപ്പൂചൂടുന്ന വസന്തം വിടര്‍ന്നേയ്ക്കാം,
ഓണപ്പൂവിളി വീന്ടുമുയരാമങ്കണത്തില്‍്.

ആതിരപ്പൂനിലാവിന്‍ വെണ്‍ചേല ചുറ്റിവീണ്‍ടും,
പാതിരാപ്പൂചൂടുവാന്‍ വന്നേക്കാം ധനുമാസം.

മാന്തളിര്‍ പൊഴിയുന്ന വൃശ്ചികപ്പുലരികള്‍,
പൂങ്കുയില്‍നാദത്തിനാല്‍ പുളകമണിഞ്ഞേയ്ക്കാം.

വര്‍ണ്ണനാതീതമായ പ്രണയസുഗന്ധത്താല്‍,
നിറയാം മനം വീണ്ടുമുയരാം കിനാവുകള്‍.

പ്രാണനില്‍ പ്രണയത്തിന്‍ പനിനീരലിയുമ്പോള്‍,
കനവില്‍ വീണ്‍ടുമൊരു കവിതയുണര്‍ന്നേയ്ക്കാം.